भोलि नेपालगञ्जमा वाकाथन, सहभागी हुन आह्वान

स्वास्थ्य

गृहपृष्ठ
स्वास्थ्य
भोलि नेपालगञ्जमा वाकाथन, सहभागी हुन आह्वान

भोलि नेपालगञ्जमा वाकाथन, सहभागी हुन आह्वान

शुक्रबार, चैत ८, २०८१ बागेश्वरी पोस्ट

नेपालगञ्ज । भोलि शनिबार बिहान नेपालगञ्जमा हुने प्रातःकालीन हिँडाई अर्थात वाकाथनमा सबैलाई सहभागी हुन डा. किशोर खत्रीले आह्वान गरेका छन् ।

नेपाल चिकित्सक संघ भेरीले आयोजना गरेको वाकाथनका संयोजक डा. खत्रीले 'स्वास्थ्यका लागि प्रातःकालीन हिँडाई' भन्ने मूल नारासहित वाकाथन हुन लागेको आज नेपालगञ्जमा आयोजित पत्रकार सम्मेलनमार्फत जानकारी दिए ।

पत्रकारहरुसँगको भेटघाटमा टिसर्ट सार्वजनिक गर्दै उनले स्वास्थ्य सचेतना विस्तार गर्ने उद्देश्यसहित वाकाथन आयोजना गरिएको बताए । बालरोग विशेषज्ञ डा. खत्रीले वाकाथानलाई अभियानकै रुपमा लिएर हिँडेका छन् । हिँड्नु स्वास्थ्यका लागि स्वस्थ हुने पहिलो आधार हो भन्ने गरेका उनले आफूले यसलाई अभियानको रुपमा अगाडि बढाएको बताए । पूर्व राजा ज्ञानेन्द्र शाहदेखि पार्टीका उच्च पदाधिकारीहरुसँग विहानी प्रहरको हिँडाईमा सहभागी भइसकेको जानकारी दिँदै उनले भने–‘अब नेपालगञ्जबासीसँगै हिँडेर यसको महत्व बुझाउनु छ ।’

शनिवार नेपालगञ्जको गणेशमान चोक नजिकै रहेको नेपाल चिकित्सक संघ भेरी शाखाबाट सुरु हुने वाकाथन विरेन्द्र चोक पुगेर पुनः गणेशमान चोकमा आएर समापन हुने उनले बताए । ‘स्वास्थ्य सचेतना विस्तार गर्ने तथा नेपालगञ्जको पर्यटकीय स्थलहरुको प्रवर्द्धन गर्ने र आम नेपाली दाजुभाई, दिदिवहिनीहरुलाई एकताको मालामा गाँस्ने उद्देश्य पनि यो वाकाथनको हो’–उनले भने ।

वाकाथनमा स्वास्थ्य तथा जनसंख्या मन्त्री प्रदीप पौडेल, स्वास्थ्य सचिव डा. विकास देवकोटा समेत सहभागी हुने कार्यक्रम संयोजक डा. खत्रीले जानकारी दिए ।

प्रकाशित मिति: शुक्रबार, चैत ८, २०८१ २०:४०