उपेक्षामा अल्बिनो प्रभावितहरु, अपांगताको सूचीमा समावेश गर्न माग

स्वास्थ्य

गृहपृष्ठ
स्वास्थ्य
उपेक्षामा अल्बिनो प्रभावितहरु, अपांगताको सूचीमा समावेश गर्न माग

उपेक्षामा अल्बिनो प्रभावितहरु, अपांगताको सूचीमा समावेश गर्न माग

बुधबार, जेठ ७, २०८२ बागेश्वरी पोस्ट

नेपालगञ्ज । अल्बिनो भएका ब्यक्तिहरुलाई राज्यले अपांगताको दर्जा दिए पनि अपांगताको सूचीमा राखेको छैन । अल्बिनो भएका ब्यक्तिहरु आत्मसम्माान र रोजगारीसंगै अपांगताको सूचीमा आफूहरुलाई समावेश गरेर राज्यले विशेष सुविधा दिनुपर्ने बताउँछन् । अलबिनो एक प्रकारको अपाङ्गता हो । शरीरमा छालालाई प्राकृतिक रंग र गुण दिने पदार्थको कमीले छाला र कपाल सेतै हुने समस्यालाई अलबिनो भनिन्छ ।

अलबिनो भएका व्यक्तिलाई घाममा हिँड्दा छाला पोल्ने, आँखा कम देख्ने लगायतका समस्याहरु हुन्छन् । जसले गर्दा उनीहरुलाई पढ्न, लेख्न तथा रोजगारीका लागि समेत समस्या हुने गरेको राष्ट्रिय अपांग अल्बिनो नेपालका केन्द्रिय अध्यक्ष टेकराज जैसी बताउँछन् । घाममा जाँदा ग्राह्रो हुने र दृष्टिमा पनि समस्या हुने अवस्थालाई समेत राज्यले विभेद गर्दा आफूहरु निकै दुःखी हुने अल्बिनो प्रभावितहरु बताउँछन् । अपांगताको सूचीमा समावेश नगरेर अल्बिनो भएका ब्यक्तिहरुमाथि अन्याय भएको दैलेखको दुल्लु नगरपालिका वडा नम्बर ८ घर भई हाल नेपालगञ्ज बस्दै आएकी अल्बिनो प्रभावित भगवती भण्डारीको गुनासो छ ।

अल्बिनो भएका कारण छालाको संक्रमणको जोखिम उच्च हुन्छ । यस्तो ब्यक्तिहरु घाम भएको अवस्थामा हिँड्ड्ल गर्न सक्दैनन् । घामले पोल्दा पनि आगोले पोलेको जस्तो हुने उनीहरु बताउँछन् । त्यसका लागि सनस्क्रिन क्रिम लगाउँदा सहज हुने भएकाले सरकारले आफूहरुलाई निःशुल्करुपमा उपलब्ध गराउनुपर्ने माग अल्बिनो प्रभावितहरुको छ । बाँकेको खजुरा गाउँपालिका वडा नम्बर ४ की कविता विश्वकर्मा आफूहरुलाई घाममा हिँड्डुल गर्न अनिवार्यरुपमा सनस्क्रिन क्रिम लगाउनुपर्ने बाध्यता हुने हुँदा सरकारले निःशुल्क उपलब्ध गराउनुपर्ने माग गर्छिन् ।

अलबिनो संक्रमण सरुवा रोग होइन । यो एक प्रकारको रसायनको गडबडीले हुने बंशाणुगत समस्या हो । त्यसैले उनीहरुलाई विभेद गर्न नहुने चिकित्सकहरु बताउँछन् । भेरी अस्पताल नेपालगञ्जका छाला रोग विशेषज्ञ डा. बद्री चापागाईंले अलबिनो प्रभावितहरुलाई हेयको दृष्टिकोणले नभई सम्मानित ब्यवहार गर्नुपर्ने बताउँछन् । "यो बंशाणुगत समस्या हो, उहाँहरुलाई घाममा निकै गाह्रो हुन्छ, त्यसैले उहाँहरुको बृत्ति विकासमा विशेष ध्यान दिनुपर्दछ," डा. चापागाईंले भने । नेपालमा करीब ८ देखि १० हजार जना अल्बिनोबाट प्रभावित भएको अनुमान छ ।

प्रकाशित मिति: बुधबार, जेठ ७, २०८२ २१:००

प्रतिक्रिया दिनुहोस्