विश्व सुर्तीजन्य पदार्थरहित दिवस: नेपालगन्जमा हाजिरीजवाफ

स्वास्थ्य

गृहपृष्ठ
स्वास्थ्य
विश्व सुर्तीजन्य पदार्थरहित दिवस: नेपालगन्जमा हाजिरीजवाफ

विश्व सुर्तीजन्य पदार्थरहित दिवस: नेपालगन्जमा हाजिरीजवाफ

शनिबार, जेठ १७, २०८२ बागेश्वरी पोस्ट

नेपालगन्ज । नेपालगन्जमा विश्व सूर्तीजन्य पदार्थरहित दिवस २०२५ को अवसरमा आयोजना गरिएको हाजिरीजवाफ प्रतियोगितामा मध्यपश्चिम प्राविधिक शिक्षालय प्रथम भएको छ । दिवसको अवसरमा नेपालगन्ज उपमहानरपालिकाको आयोजनामा शुक्रबार उपमहानरपालिका परिसरमा भएको प्रतियोगितामा मध्यपश्चिम प्रथम हुन सफल भएको हो ।

यस्तै प्रतियोगितामा सुष्मा कोइराला मेमोरियल कलेज द्वितीय हुन सफल भएको छ भने कलेज अफ अलाइड हेल्थ साइन्स नेपालगन्ज तृतीय स्थान ल्याउन सफल भएको छ । प्रतियोगिताका प्रथम, द्वितीय र तृतीयलाई क्रमश: नगद दुई हजार, एक हजार पाँच सय र एक हजार तथा प्रमाणपत्रसहित पुरस्कृत गरिएको थियो ।

विजयी कलेजका विद्यार्थीहरुलाई नेपालगन्ज उपमहानगरपालिकाका प्रमुख प्रशान्त बिष्टले नगद पुरस्कार र प्रमाणपत्र प्रदान गरेका थिए । सोही अवसरमा बोल्दै नगर प्रमुख बिष्टले सूर्तीजन्य पदार्थको सेवन हानिकारक भएको बताए । यो नराम्रो कार्य भएकाले सबैले यस्ता कुलतलाई त्याग्नुपर्ने बताए । प्रमुख प्रशासकीय अधिकृत रामहरि शर्माले विद्यार्थीहरु भनेको यसलाई नियन्त्रण गर्न सक्ने क्षमता भएको व्यक्ति भएको बताएका थिए । उनले यसखालको कुलत बिरुद्ध सबैको सक्रियतासँगै विद्यार्थी एम्बासडरका रुपमा प्रस्तुत हुनुपर्ने कुरामा जोड दिएका थिए ।

यसैगरी स्वास्थ्य महाशाखा प्रमुख राम बहादुर चन्दले विद्यालयस्तरमा सचेतना फैलाउन कार्यक्रम आयोजना गरिएको जानकारी गराउँदै यस बिरुद्धमा युवा पुस्ताको आवश्यकता रहेको बताए । कार्यक्रममा उपमहानगरपालिकाका कार्यपालिका सदस्य वसन्त कनोजिया, मो. मुजम्मिल हुसेन लगायतको उपस्थिति रहेको थियो ।

प्रतियोगितामा नेपालगन्जका विभिन्न ७ वटा कलेजका विद्यार्थीहरुको समूहले सहभागिता जनाएको फोकल पर्सन एवम् जनस्वास्थ्य निरीक्षक सरोज रिमालले बताए ।

प्रकाशित मिति: शनिबार, जेठ १७, २०८२ १७:५६

प्रतिक्रिया दिनुहोस्