काँग्रेस क्षेत्र नं. १ बाँकेद्वारा निःशुल्क स्वास्थ्य शिविरः एक सय बढी महिलाको पाठेघर परीक्षण

स्वास्थ्य

गृहपृष्ठ
स्वास्थ्य
काँग्रेस क्षेत्र नं. १ बाँकेद्वारा निःशुल्क स्वास्थ्य शिविरः एक सय बढी महिलाको पाठेघर परीक्षण

काँग्रेस क्षेत्र नं. १ बाँकेद्वारा निःशुल्क स्वास्थ्य शिविरः एक सय बढी महिलाको पाठेघर परीक्षण

बुधबार, साउन ७, २०८२ बागेश्वरी पोस्ट

नेपालगञ्ज । नेपाली काँग्रेस बाँके क्षेत्र नम्बर १ ले बाँकेको राप्तीसोनारी गाउँपालिका-७ नन्कौपुरमा महिलाहरुलाई लक्षित गरी एक दिने निःशुल्क स्वास्थ्य शिविर गरेको छ । स्व. वीपी कोइरालाको ४३औं स्मृति दिवसको अवसरमा आज आयोजित महिलाहरुको पाठेघरको मुखको क्यान्सरको पहिचान र बाँझोपन सम्वन्धि शिविरमा स्थानीय एक सय बढी महिलाहरुले सेवा लिएका छन् । नेपालगञ्जस्थित एचसीआरसी हस्पिटलकी प्रसूति तथा स्त्रीरोग विशेषज्ञ डा. मञ्जु विसीको नेतृत्वको चिकित्सक तथा स्वास्थ्यकर्मीको टिमले शिविरमा आएका बिरामीहरुको स्वास्थ्य चेकजाँचसँगै परामर्श सेवा प्रदान गरेको थियो । शिविरमा आएका अधिकांश महिलामा सेतो पानी वग्ने, पाठेघर खस्ने तथा बाँझोपनको समस्या देखिएको डा. विसीले जानकारी दिइन् । भिआइए परीक्षणमा एक-दुई जनामा पाठेघरको मुखको क्यान्सरको शंकास्पद लक्षण चिन्ह देखिएको बताउँदै उनले थप परीक्षणका लागि रिफर गरिएको बताइन् ।

May be an image of 7 people, temple and text

डा. विसीले महिलाहरुमा पाठेघरको मुखको क्यान्सर अहिले सबैभन्दा चुनौतिपूर्ण बनेको बताइन् । उनले नियमित चेकजाँचको अभाव र स्वास्थ्यप्रतिको हेलचेक्र्याइँका कारण महिलाहरुको पाठेघरको क्यान्सरसँग जुधिरहेको समेत उल्लेख गरिन् । उनले आफ्नो स्वास्थ्यप्रति सजग रहन महिलाहरुलाई आग्रह समेत गरिन् । एचसीआरसी हस्पिटलसँगको प्राविधिक र राप्तीसोनारी गाउँपालिकाको सहयोगमा भएको उक्त शिविरमा महिलाहरुमा बढ्दो पाठेघरको मुखको क्यान्सर रोकथाम तथा न्यूनीकरणमा सहयोग पुर्याउने उद्देश्यले शिविर गरिएको काँग्रेस क्षेत्रीय सभापति पोषण केसीले जानकारी दिए । उनका अनुसार स्वास्थ्यको पहुँच भन्दा टाढा रहेका महिलाहरुलाई प्राथमिकतामा राखेर गाउँघरमै विशेषज्ञ चिकित्सकबाट निःशुल्क उपचार सेवा प्रदान गरिएको हो । काँग्रेस राजनीतिक मुद्दामा मात्र केन्द्रित नभएर आमनागरिकको स्वास्थ्यप्रति पनि अत्यन्तै सजग र जिम्मेवार रहेको पनि उनले बताए ।

काँग्रेस लुम्विनी प्रदेश सभा सदस्य तथा पार्टीकी प्रदेश स्वास्थ्य विभाग प्रमुख अञ्जना पाण्डेले महिलाहरुमा लाज र डरका कारण रोगहरु लुकाउने प्रवृत्ति रहेको भन्दै गाउँघरमा आयोजना गरिने यस्ता शिविरले उनीहरुलाई ठूलो राहत दिने बताइन् । उनले विशेषज्ञ चिकित्सकहरुबाटै स्वास्थ्य सेवा प्रवाह गरिँदा रोगको पहिचान समयमै हुने र त्यसले उपचारमा पनि सहजता ल्याउने बताइन् । काँग्रेस लुम्विनी प्रदेशका सल्लाहकार हुर्मत न्यौपानेले पनि विशेषज्ञ चिकित्सकहरुको उपस्थितिमा गरिने यस्ता शिविरले स्वास्थ्यमा पहुँच नभएका महिलाहरुलाई फाइदा पुग्ने बताए । प्रदेश ‘क’ का सभापति अमर बहादुर बुढाथोकीको स्वागत मन्तव्यबाट सुरु भएको उक्त कार्यक्रमको सञ्चालन क्षेत्रीय सचिव खुम बहादुर बस्नेतले गरेका थिए । कार्यक्रममा काँग्रेसका जिल्ला सदस्य देव बहादुर खाँड, प्रदेश ‘ख’ का सभापति बलराम शर्मा, राप्तीसोनारी गाउँपालिकाका सभापति भीम राना, राप्तीसोनारी गाउँपालिकाका उपाध्यक्ष मनिषा सिंह थारु लगायतको उपस्थिति रहेको थियो ।

May be an image of 6 people and child