संविधान पिता कोइरालाको जन्मजयन्तीमा साउन २७ गते निःशुल्क स्वास्थ्य शिविर हुने

स्वास्थ्य

गृहपृष्ठ
स्वास्थ्य
संविधान पिता कोइरालाको जन्मजयन्तीमा साउन २७ गते निःशुल्क स्वास्थ्य शिविर हुने

संविधान पिता कोइरालाको जन्मजयन्तीमा साउन २७ गते निःशुल्क स्वास्थ्य शिविर हुने

आइतबार, साउन २५, २०८२ बागेश्वरी पोस्ट

नेपालगञ्ज । संविधानका पिता, नेपाली काँग्रेसका पूर्व सभापति एवम् पूर्व प्रधानमन्त्री सुशील कोइरालाको ८५औं जन्मजयन्तीका अवसरमा बाँकेको नरैनापुर गाउँपालिकाको मटेहियामा एक दिने निःशुल्क स्वास्थ्य शिविर सञ्चालन हुने भएको छ ।

नेपाली काँग्रेस बाँके र नेपाल स्वास्थ्यकर्मी संघ बाँकेको संयुक्त आयोजनामा साउन २७ गते मंगलबार स्वास्थ्य शिविर आयोजना गर्न लागिएको हो । काँग्रेसको सामाजिक कार्यक्रम अन्तर्गत दुरदराजका नागरिकलाई घरदैलोमै विशेष सेवा उपलव्ध गराउने योजना अनुरुप स्वास्थ्य शिविर आयोजना गर्न लागिएको पार्टी जिल्ला सभापति नारायण प्रसाद गौडेलले जानकारी दिए ।

बाँकेको नरैनापुर जिल्लाको सदरमुकाम नेपालगञ्जवाट टाढा रहेको छ भने जिल्लाका अन्य पालिकाको तुलनामा नरैनापुरमा पूर्वाधार विकास, सरकारी निकायको उपस्थिति, शिक्षा, स्वास्थ्य लगायतका सेवाको अवस्था कमजोर रहेको छ । सोही अवस्थालाई दृष्टिगत गरी सो गाउँपालिकालाई स्वास्थ्य शिविर आयोजनाका लागि छनोट गरिएको जनाइएको छ ।

स्वास्थ्य शिविर सञ्चालनका लागि बाँकेका केही पालिकाहरु र शिखर हेल्थ केयर एण्ड डाइग्लोष्टिक सेन्टर प्रलिले प्राविधिक सहयोग उपलव्ध गराएको नेपाल स्वास्थ्यकर्मी संघ बाँकेका अध्यक्ष जागेश्वर बस्नेतले बताए । शिविरमा मूलतः फिजिसियन, रक्तचाप, मधुमेह, मुटुरोग, श्वासप्रश्वास र मृगौला सम्बन्धि रोगहरुको जाँच तथा परामर्श दिइनेछ । शिविरमा शिखर हेल्थ केयर एण्ड डाइग्लोष्टिक सेन्टर प्रलिका डिएम नेफ्रोलोजिष्ट डा. सौरभसिंह हमाल सहितको स्वास्थ्यकर्मीहरुले सेवा दिनेछन् ।

शिविर शुभारम्भका अवसरमा नेपाली काँग्रेस बाँकेका सभापति गौडेलसहितका पार्टी पदाधिकारी तथा कार्यकर्ताहरु, स्वास्थ्यकर्मी संघका पदाधिकारी तथा सदस्य लगायतको उपस्थिति रहने जनाइएको छ ।

प्रकाशित मिति: आइतबार, साउन २५, २०८२ १९:५०

प्रतिक्रिया दिनुहोस्