स्वास्थ्य मन्त्रालयको 'लैङ्गिक समानता तथा सामाजिक समावेशीकरण रणनीति' स्थानीय तहमा कार्यान्वयन गर्न सुरु

स्वास्थ्य

गृहपृष्ठ
स्वास्थ्य
स्वास्थ्य मन्त्रालयको 'लैङ्गिक समानता तथा सामाजिक समावेशीकरण रणनीति' स्थानीय तहमा कार्यान्वयन गर्न सुरु

स्वास्थ्य मन्त्रालयको 'लैङ्गिक समानता तथा सामाजिक समावेशीकरण रणनीति' स्थानीय तहमा कार्यान्वयन गर्न सुरु

शुक्रबार, साउन ३०, २०८२ बागेश्वरी पोस्ट

नेपालगञ्ज । स्वास्थ्य तथा जनसंख्या मन्त्रालयले तयार पारेको 'स्वास्थ्य क्षेत्रको लैङ्गिक समानता तथा सामाजिक समावेशीकरण रणनीति' स्थानीय तहमा कार्यान्वयन गर्न सुरु गरेको छ । लुम्विनी प्रदेशका १०९ वटै पालिकाका महिला तथा बालबालिका शाखा प्रमुखहरुलाई नेपालगञ्जमा बोलाएर रणनीतिको आवश्यकता, औचित्य र कार्यान्वयनका लागि संस्थागत संयन्त्रबारे जानकारी गराइएको मन्त्रालयलका शाखा अधिकृत टंक गौतमले जानकारी दिए । २०८० मा जारी भएको उक्त रणनीतिमा स्थानीय तहमा उपप्रमुख वा उपाध्यक्षको संयोजकत्वमा महिला तथा बालबालिका शाखा सदस्य सचिव रहने गरी समन्वय समितिको परिकल्पना गरिएको छ । तर, अहिलेसम्म धेरैजसो स्थानीय तहमा समिति बनेका छैनन् ।

महिला, दलित, आदिवासी, जनजाति, जेष्ठ नागरिक, सीमान्तकृत, अपांगता तथा यौनिक अल्पसंख्यक नागरिकहरुलाई स्वास्थ्यको मूलप्रवाहीकरणमा ल्याउन रणनीति कार्यान्वयनमा ल्याइएको मन्त्रालयका सहसचिव ऋषि आचार्यले बताए । उनले भने–‘प्रत्येक नागरिकलाई आधारभूत स्वास्थ्य अधिकार र आकस्मिक सेवा सुनिश्चित गर्न रणनीति स्थानीय तहमा पनि कार्यान्वयन जरुरी छ ।’ मन्त्रालयका शाखा अधिकृत गौतमले रणनीतिको उद्देश्य, प्राथमिकताका क्षेत्र, कार्यनीति लगायत समेटिएको कार्यपत्र र लुम्विनी प्रदेश स्वास्थ्य मन्त्रालयका वरिष्ठ नर्सिङ प्रशासक ईश्वरी केसीले लैङ्गिक समानता तथा सामाजिक समावेशीकरण नीतिमा समेटिएको कार्यपत्र प्रस्तुत गरेका थिए ।

अन्तरक्रिया कार्यक्रमको समापन सत्रलाई सम्वोधन गर्दै लुम्विनी प्रदेशका स्वास्थ्य सचिव दुर्गालक्ष्मी श्रेष्ठले लुम्विनी प्रदेशले अब बनेको नीतिलाई कार्ययोजनामा लैजाने प्रतिबद्धता जनाइन् । स्वास्थ्य सेवाको पहुँचमा सरलता र सहजता काम गर्ने सवालमा रणनीति उपयोगीपूर्ण रहेको भन्दै सहभागीहरुले कार्यान्वयनमा सहजीकरणको प्रतिवद्धता जनाएको वरिष्ठ कम्युनिटी नर्सिङ अधिकृत सुनालक्ष्मी कर्माचार्यले बताइन् । कार्यक्रममा सहभागी भएकाहरुलाई मन्त्रालयका उपसचिव प्रभप्रसाद सापकोटाले स्वागत गरेका थिए ।

प्रकाशित मिति: शुक्रबार, साउन ३०, २०८२ १७:२४

प्रतिक्रिया दिनुहोस्