नरैनापुरमा कांग्रेस क्षेत्र नम्बर १ बाँकेको निःशुल्क स्वास्थ्य शिविरः २८१ जना लाभान्वित

स्वास्थ्य

गृहपृष्ठ
स्वास्थ्य
नरैनापुरमा कांग्रेस क्षेत्र नम्बर १ बाँकेको निःशुल्क स्वास्थ्य शिविरः २८१ जना लाभान्वित

नरैनापुरमा कांग्रेस क्षेत्र नम्बर १ बाँकेको निःशुल्क स्वास्थ्य शिविरः २८१ जना लाभान्वित

सोमबार, भदौ २, २०८२ बागेश्वरी पोस्ट

नरैनापुर (बाँके) । बाँकेको नरैनापुर गाउँपालिकामा सञ्चालन गरिएको निःशुल्क स्वास्थ्य शिविरमा २८१ जनाले सेवा लिएका छन् । वडा नम्बर २ गंगापुरस्थित प्राथमिक स्वास्थ्य केन्द्रमा आज नेपाली कांग्रेस क्षेत्र नम्बर १ बाँकेले महिलाहरुको पाठेघरको मुखको क्यान्सरको पहिचान, बाँझोपन र छाला रोग सम्बन्धि निःशुल्क स्वास्थ्य शिविर आयोजना गरेको थियो । शिविरमा प्रसूति तथा स्त्री रोग विशेषज्ञ डा. मञ्जु बिसी शाह र छाला रोग विशेषज्ञ डा. अनिशा उप्रेति नेतृत्वको टिमले स्वास्थ्य चेकजाँच तथा परामर्श सेवा प्रदान गरेको थियो भने नरैनापुर स्वास्थ्य शाखाका प्रमुख नगेन्द्र कुमार साह नेतृत्वको स्वास्थ्यकर्मीको टिमले सहजीकरण गरेको थियो ।

शाहका अनुसार पाठेघर सम्बन्धि ११० जना र छाला सम्बन्धि १७१ जना गरी २८१ जनाको स्वास्थ्य चेकजाँच गरिएको छ ।नेपाली काँग्रेसका पूर्व सभापति तथा पूर्व प्रधानमन्त्री स्व. सुशील कोइरालाको ८६औं जन्मजयन्तीको अवसरमा नरैनापुर गाउँपालिकाको सहयोग र एचसीआरसी अस्पताल नेपालगञ्ज तथा नेपाल परिवार नियोजन संघको प्राविधिक सहयोगमा शिविर आयोजना गरिएको हो ।

शिविर उद्घाटन गर्दै काँग्रेस क्षेत्रीय सभापति पोषण केसीले महिलाहरुमा पाठेघरको मुखको क्यान्सर गम्भीर स्वास्थ्य समस्याका रुपमा रहेको बताउँदै त्यसको समयमै पहिचान गरेर निदानमा सहजता होस् भन्ने उद्देश्यले शिविर गरिएको बताए । सामाजिक उत्तरदायित्व बहन गर्दै क्षेत्रीय कार्यसमितिले निरन्तररुपमा शिविर लगायतका गतिविधि सञ्चालन गरिरहेको केसीले बताए । स्वास्थ्य सेवामा कमजोर पहुँच भएका मधेशी र मुस्लिम समुदायका महिलाहरुको सहजताका लागि शिविर गरिएको उनको भनाई छ ।

कार्यक्रममा नरैनापुर गाउँपालिकाका अध्यक्ष इश्तियाक अहमद शाहले पालिकाका महिलाहरुको लागि स्वास्थ्य शिविर अत्यन्तै उपयोगी रहने बताए । यस्तै काँग्रेस लुम्बिनी प्रदेश सदस्य एवम् नरैनापुर १ का वडा अध्यक्ष इशाक जोलाहले ग्रामीण क्षेत्रमा आयोजना गरिएको शिविरबाट स्वास्थ्यको पहुँच नपुगेका स्थानीय लाभान्वित भएको बताए । पार्टीका नरैनापुर गाउँपालिका सभापति मेराज अहमद खाँको अध्यक्षतामा सम्पन्न भएको उद्घाटन कार्यक्रममा क्षेत्रीय सदस्य नसरुद्दिन शेषले स्वागत मन्तब्य ब्यक्त गरेका थिए । क्षेत्रीय सचिव जयेश्वर पौडेलले कार्यक्रम सञ्चालन गरेका थिए ।

प्रकाशित मिति: सोमबार, भदौ २, २०८२ १८:५६

प्रतिक्रिया दिनुहोस्