भेरी अस्पतालमा थपिए चार डायलाइसिस मेसिन, विरामीलाई राहत

स्वास्थ्य

गृहपृष्ठ
स्वास्थ्य
भेरी अस्पतालमा थपिए चार डायलाइसिस मेसिन, विरामीलाई राहत

भेरी अस्पतालमा थपिए चार डायलाइसिस मेसिन, विरामीलाई राहत

मंगलबार, कात्तिक ११, २०८२ बागेश्वरी पोस्ट

नेपालगञ्ज । भेरी अस्पताल नेपालगञ्जले मिर्गौला पीडितका लागि थप चार वटा डायलाइसिस मेसिन सञ्चालनमा ल्याएपछि उपचार लिन आउने बिरामीलाई ठूलो सहजता मिल्ने भएको छ । अस्पतालले थप चार वटा मेसिन सञ्चालनमा ल्याएसँगै दैनिक उपचार क्षमतामा उल्लेख्य वृद्धि भएको छ ।

यसअघि अस्पतालमा रहेका ६ वटा मेसिनमार्फत तीन वटा सिफ्टमा दैनिक १८ जनाको मात्र डायलाइसिस हुँदै आएको थियो । अब कुल १० वटा मेसिनमार्फत तीन सिफ्टमा दैनिक ३० जना बिरामीले सेवा लिन सक्ने अस्पतालका प्रमुख मेडिकल सुपरिटेन्डेन्ट डा. निराजन सुवेदीले बताए । अस्पतालका नर्सिङ निरीक्षक बिना घलेका अनुसार ती मध्ये दुई वटा मेसिन विशेष रूपमा सेरोपोजेटिभ बिरामी (हेपाटाइटिस र एचआइभी संक्रमित) का लागि छुट्याइएको छ ।

'संक्रमण नियन्त्रण र संवेदनशीलताका दृष्टिले यी बिरामीलाई अलग्गै सुविधा दिइएको हो,’ उनले भने । अस्पतालका प्रमुख मेडिकल सुपरिटेन्डेन्ट डा. सुवेदीले मेसिन थप भएपछि डायलाइसिस सेवामा देखिएको भीड र पालो कुर्नुपर्ने समस्या धेरै घट्ने बिश्वास व्यक्त गरे । डायलाइसिसका लागि पालो नपाउँदा कतिपय बिरामीहरु महँगो रुपैयाँ तिरेर निजी अस्पतालबाट सेवा लिन बाध्य थिए ।

डा. सुवेदीका अनुसार स्वास्थ्य विभागबाट तीन वटा नयाँ मेसिन प्राप्त भएका हुन् भने एउटा मेसिन अस्पतालले आफ्नै स्रोतबाट मर्मत गरी सञ्चालनमा ल्याएको हो । साथै, पुराना बेडहरुको पनि मर्मत र सुधार गरिएको छ, जसले सेवा गुणस्तरमा थप सुधार ल्याएको छ । अस्पतालले डायलाइसिस वार्ड विस्तारसँगै एनआइसीयू (नवजात शिशु गहन उपचार इकाई) क्षेत्रका बेड पनि व्यवस्थित गरेको जनाएको छ ।

प्रकाशित मिति: मंगलबार, कात्तिक ११, २०८२ २०:२४

प्रतिक्रिया दिनुहोस्