शिशु मृत्यु घटनाबारे के भन्छ भेरी अस्पताल ?

स्वास्थ्य

गृहपृष्ठ
स्वास्थ्य
शिशु मृत्यु घटनाबारे के भन्छ भेरी अस्पताल ?

शिशु मृत्यु घटनाबारे के भन्छ भेरी अस्पताल ?

शुक्रबार, पुस ४, २०८२ बागेश्वरी पोस्ट

नेपालगञ्ज । भेरी अस्पतालमा मृत घोषणा गरिएको शिशुमा चार घण्टापछि जीवनको संकेत र फेरि मृत्यु भएको भनिएको घटनाका विषयमा अस्पतालले बनाएको आन्तरिक छानविन समितिको प्रतिवेदनबारे पत्रकारहरुलाई जानकारी गराइएको छ । अस्पतालका प्रमुख मेडिकल सुपरिन्टेन्डेन्ड डा. निराजन सुवेदीले आज विहान अस्पतालमै पत्रकार सम्मेलनको आयोजना गरी यस्ता घटनालाई दुर्लभ भन्दै बिरामीका आफन्तलाई सञ्चार र परामर्शमा कमजोरी भए पनि उपचार प्रक्रियामा अपनाउनुपर्ने प्रोटोकलमा भने कुनै कमजोरी नभएको बताए । मंसिर २५ गते पेट दुखाईका कारण एक गर्भवती महिला भेरी अस्पतालको लेबर कक्षमा भर्ना भएकी थिइन् ।

२८ गते गर्भ खसेपछि शिशुमा मुटुको चाल र श्वास–प्रश्वास जस्ता जीवनका कुनै संकेत नदेखिएको भन्दै मृत घोषणा गरी परिवारलाई हस्तान्तरण गरिएको थियो । तर, हस्तान्तरण भएको करिब चार घण्टापछि शिशुमा जीवन संकेत देखिएपछि परिवारले सञ्जीवनी अस्पतालमा भर्ना गरी उपचार गराएका थिए । उपचारकै क्रममा २९ गते शिशुको मृत्यु भएको थियो । डा. विवेक महतो नेतृत्वको छानविन समितिले तयार पारेको प्रतिवेदनबारे जानकारी गराउँदै प्रमुख मेडिकल सुपरिन्टेन्डेन्ट डा. सुवेदीले गर्भवती महिला अस्पताल आउँदा पाठेघरको पानीको फोका फुटिसकेको अवस्था रहेको जानकारी गराए । सुवेदीका अनुसार गर्भ अवधि केवल २३ हप्ता पुगेको, भिडियो एक्स–रेमा शिशुको तौल ६१७ ग्राम मात्र देखिएको, मुटुको चाल कमजोर रहेको तथा आमालाई ज्वरो र रगतमा संक्रमणका लक्षण देखिएकाले गर्भावस्थालाई निरन्तरता दिन नसकिने अवस्था थियो ।

जन्मको समयमा शिशुमा जीवनका कुनै संकेत नदेखिएको, गर्भ अवधि २८ हप्ता भन्दा कम र तौल १००० ग्राम भन्दा कम भएकाले बाँच्ने सम्भावना अत्यन्त न्यून रहेको निष्कर्षसहित परिवारलाई हस्तान्तरण गरिएको उनले प्रष्ट पारे । यो बारेमा बिरामीका आफन्त र उनीहरुसँगै आएका स्वास्थ्यकर्मीलाई समेत जानकारी गराइएको मेसु सुवेदीले बताए । 'जन्मिएका र अत्यन्तै कम तौल भएका शिशुमा कहिलेकाहीँ श्वासप्रश्वास, मुटुको चाल वा अन्य कुनै पनि जीवनचिन्ह नदेखिने सम्भावना हुन्छ । यो केशमा पनि भएको यही नै हो,' उनले भने-‘सस्पेन्डेड एनिमेसन र लाजरस फेनोमेनन जस्ता दुर्लभ अवस्था देखिँदा जीवन संकेत ढिलो गरी देखा पर्न सक्छ ।’ तर उनले आफन्तलाई जटिलताबारे पर्याप्त सञ्चार र परामर्शमा अस्पतालबाट कमजोरी भएपनि उपचार प्रक्रियामा भने कमजोरी नभएको बताए । आगामी दिनमा थप सहजगता र सावधानीका लागि अस्पताल प्रशासन गम्भीर रहेको उनले बताए ।

प्रकाशित मिति: शुक्रबार, पुस ४, २०८२ १५:५३

प्रतिक्रिया दिनुहोस्