'लुम्बिनी प्रदेशमा मातृ मृत्युदर र कुपोषणको अवस्था चिन्ताजनक'

स्वास्थ्य

गृहपृष्ठ
स्वास्थ्य
'लुम्बिनी प्रदेशमा मातृ मृत्युदर र कुपोषणको अवस्था चिन्ताजनक'

'लुम्बिनी प्रदेशमा मातृ मृत्युदर र कुपोषणको अवस्था चिन्ताजनक'

बुधबार, पुस २३, २०८२ बागेश्वरी पोस्ट

नेपालगञ्ज । लुम्बिनी प्रदेशका स्वास्थ्य मन्त्री खेम बहादुर सारुले प्रदेशको स्वास्थ्य अवस्था सुधारका लागि दुई वटा थिममा रहेर काम भइरहेको बताएका छन् । स्वास्थ्य कार्यालय बाँकेद्वारा आज नेपालगञ्जमा आयोजित आर्थिक वर्ष २०८२/८३ को प्रथम चौमासिक अवधिका जनस्वास्थ्य कार्यक्रमहरुको समीक्षा तथा कार्ययोजना गोष्ठीलाई सम्बोधन गर्दै उनले सुशासन र गुणस्तरीय सेवालाई प्राथमिकतामा राखेर काम गरिरहेको बताए । उनका अनुसार सुशासन अन्तर्गत प्रणाली, जवाफदेहिता र पारदर्शितालाई सूचकका रुपमा लिइएको छ भने गुणस्तरीय सेवा अन्तर्गत जनशक्तिको व्यवस्थापन, औषधि उपचार तथा जनचेतनालाई सूचक बनाइएको छ । मन्त्री सारुले लुम्बिनी प्रदेशमा मातृ मृत्युदर र कुपोषणको अवस्था चिन्ताजनक रहेको उल्लेख गर्दै त्यसतर्फ प्रदेश सरकार गम्भीर रहेको बताए ।

स्वास्थ्य सचिव दुर्गालक्ष्मी श्रेष्ठले बढ्दो मातृ तथा नवजात शिशु मृत्युदर रोक्न प्रदेश सरकारले तथ्यगत कारण खोजी मापदण्ड तयार गरिरहेको बताइन् । उनले मातृ तथा नवजात शिशु मृत्युदर सुधार गरेका पालिकाहरूसँग समन्वय गरी त्यहाँका सफल अभ्यास अन्य पालिकामा विस्तार गर्ने योजना बनाइएको जानकारी पनि दिइन् । नेपालगञ्ज उपमहानगरपालिकाका नगर प्रमुख प्रशान्त विष्टले संविधानले स्वास्थ्यलाई मौलिक हकका रुपमा व्यवस्था गरेको उल्लेख गर्दै स्थानीय सरकार त्यसको कार्यान्वयन प्रक्रियामा रहेको बताए । नेपालगञ्ज उपमहानगरपालिका बाँकेमा सबैभन्दा बढी मातृ मृत्युदर हुने पालिका भएको उल्लेख गर्दै उनले खुला सीमाका कारण भारत आवत–जावत गर्ने परिपाटीले नियमित स्वास्थ्य जाँच छुट्दा मातृ मृत्युदर बढेको बताए । त्यसको न्यूनीकरणका लागि आफूहरु प्रयासरत रहेको उनको भनाई छ ।

स्वास्थ्य कार्यालय बाँकेकी प्रमुख सुनिता पौडेलले बाँके मातृ मृत्युदरको ‘हब’ बन्दै गएको बताइन् । उनले स्वास्थ्यकर्मीहरुले मात्र मातृ मृत्युदर रोक्न नसक्ने भन्दै सबै सरोकारवालाको सहयोग आवश्यक रहेको औँल्याइन् ।कार्यक्रममा बाँकेका आठै पालिकाका स्वास्थ्य शाखाहरुले प्रथम चौमासिक अवधिका जनस्वास्थ्य कार्यक्रमहरूको प्रस्तुतिकरण गरेका थिए । कार्यक्रमको सहजीकरण स्वास्थ्य कार्यालय बाँकेका जनस्वास्थ्य अधिकृत नरेश श्रेष्ठले गरेका थिए । बरिष्ठ जनस्वास्थ्य अधिकृत गोकर्ण गिरीले स्वागत मन्तब्य ब्यक्त गरेका थिए ।