बाँकेमा ६ महिनामा ८६ कुष्ठरोगी पहिचान, सबैभन्दा बढी प्रभाव नरैनापुरमा

स्वास्थ्य

गृहपृष्ठ
स्वास्थ्य
बाँकेमा ६ महिनामा ८६ कुष्ठरोगी पहिचान, सबैभन्दा बढी प्रभाव नरैनापुरमा

बाँकेमा ६ महिनामा ८६ कुष्ठरोगी पहिचान, सबैभन्दा बढी प्रभाव नरैनापुरमा

शुक्रबार, माघ ९, २०८२ बागेश्वरी पोस्ट

नेपालगञ्ज । बाँकेमा चालू आर्थिक वर्षको ६ महिनामा थप ८६ जना कुष्ठरोगी पहिचान भएका छन् । साउनदेखि पुष महिनासम्म ५७ जना पुरुष र २९ जना महिला गरी ८६ जना कुष्ठरोगी पहिचान भएका हुन् ।

जानकी गाउँपालिका–३ स्थित साइनिङ अस्पताल आइएनएफ बाँकेले विश्व कुष्ठरोग दिवसको पूर्व सन्ध्यामा आज सञ्चारकर्मीसँगको अन्तरक्रियामा अस्पताल प्रमुख मंगल बहादुर थारुले बाँकेका ३६, बर्दियाका १२, जाजरकोट, रुकुम र कैलालीका ५/५, अछामका ३, दैलेखका २, दाङ, प्युठान, रोल्पा र सल्यानका १/१ जना र भारतीय १४ जना कुष्ठरोगी फेला परेको बताए । गत बर्ष १७४ जना नयाँ कुष्ठरोगी भेटिएकोमा बाँकेका मात्र ९३ जना थिए । जिल्लामा कुष्ठरोगको सबैभन्दा बढी प्रभाव नरैनापुरमा रहेको छ ।

२४ शैयाको अस्पतालले यो अवधिमा ९ हजार ८३१ जनालाई वहिरंग सेवा समेत प्रदान गरेको जनाएको छ । त्यसैगरी स्वास्थ्य समस्या पहिचान तथा अनुगमनका लागि अन्य प्रयोगशालाबाट १० हजार ७९५ जनाको परीक्षण गरिएको छ भने ७०४ जनाको स्नायुको कार्य क्षमता जाँच गरिएको छ । यो जाँच अपांगता सिध्र पहिचान तथा रोकथामका लागि गर्ने गरिन्छ । त्यसैगरी अपांगताबाट नै जोगाउन ६९ जनालाई फिजियोथेरापी अभ्यास गराइएको छ ।

बाँकेमा कुष्ठरोगको प्रभाव दर उच्च रहेको थारुको भनाई छ । नेपालमा सन् २०१० मा नै राष्ट्रियस्तरमा कुष्ठरोग निवारण भइसकेको छ । तर, बाँकेमा भने कुष्ठरोगको प्रभाव दर उच्च देखिएको छ । आइतवार कुष्ठरोग दिवस मनाइँदैछ ।

प्रकाशित मिति: शुक्रबार, माघ ९, २०८२ १६:५१

प्रतिक्रिया दिनुहोस्