कोहलपुर नगरपालिकामा छन् १०६ जना क्षयरोगी

स्वास्थ्य

गृहपृष्ठ
स्वास्थ्य
कोहलपुर नगरपालिकामा छन् १०६ जना क्षयरोगी

कोहलपुर नगरपालिकामा छन् १०६ जना क्षयरोगी

मंगलबार, चैत १०, २०८२ बागेश्वरी पोस्ट

कोहलपुर । विश्व क्षयरोग दिवसको अवसरमा बाँकेको कोहलपुर नगरपालिकाले छलफल, अन्तरक्रिया तथा क्षयरोगका बिरामीलाई पोषण प्याकेज वितरण लगायतका कार्यक्रम गरी मनाएको छ ।

कोहलपुर नगरपालिका सामाजिक विकास समितिका संयोजक इश्वरी प्रसाद विकको अध्यक्षतामा भएको कार्यक्रममा क्षयरोगको बढ्दो प्रभाव न्यूनीकरणका लागि सचेतना जरुरी रहेकोमा जोड दिइएको थियो । त्यसैगरी रोगीको पहिचान गर्ने, उनीहरुलाई नियमित औषधि सेवन गर्न प्रेरित गर्ने लगायतका कार्यक्रमलाई प्रभावकारी गराइनुपर्नेमा पनि जोड थियो । सामाजिक विकास समितिका संयोजक विकले कोहलपुर नगरपालिकाले उपलब्ध स्रोतसाधनको अधिकतम प्रयोग गरी क्षयरोग नियन्त्रणसम्बन्धि जनचेतना अभिवृद्धि, अन्तरक्रिया तथा जनचेतनामूलक कार्यक्रम गर्दै आएको बताए ।

कोहलपुर नगर स्वास्थ्य शाखा प्रमुख अनिल सेन ठकुरीले यो रोग लाग्नु भन्दा लाग्न नदिन विशेष सचेतना अपनाउनुपर्नेमा जोड दिए । उनका अनुसार कमजोर रोग प्रतिरोध क्षमता भएका तथा धुमपान, मद्यपान वा लागुऔषध सेवन गर्नेमा यो रोगको संक्रमण हुन सक्छ । त्यस्तै, क्षयरोगको औषधिको मात्रा पूर्ण सेवन नगरेमा पनि सङ्क्रमण पुनः देखिन सक्छ । औषधिको नियमित सेवनले क्षयरोग निको हुन्छ ।

कोहलपुर नगरपालिकाभित्र १०६ जना क्षयरोगीका बिरामी रहेको जनस्वास्थ्य निरीक्षक प्रेम पाण्डेले बताए । उनका अनुसार त्यसमा ३५ जना महिला छन् । सबैभन्दा बढी ६६ वर्षमाथिका २५ जना र १४ वर्ष मुनिका १५ जना रहेका छन् । कार्यक्रममा १७ जनालाई पोषण प्याकेज वितरण गरिएको पाण्डेले बताए।

प्रकाशित मिति: मंगलबार, चैत १०, २०८२ २०:३४

प्रतिक्रिया दिनुहोस्