भेरी अस्पतालमा तनाव, सुरक्षाको माग गर्दै डाक्टरहरु नै आन्दोलनमा

स्वास्थ्य

गृहपृष्ठ
स्वास्थ्य
भेरी अस्पतालमा तनाव, सुरक्षाको माग गर्दै डाक्टरहरु नै आन्दोलनमा

भेरी अस्पतालमा तनाव, सुरक्षाको माग गर्दै डाक्टरहरु नै आन्दोलनमा

मंगलबार, वैशाख १५, २०८३ बागेश्वरी पोस्ट

नेपालगञ्ज । भेरी अस्पतालमा तनाव सिर्जना भएको छ । विरामीको मृत्यु भएको घटनाले उग्ररुप लिएपछि अस्पतालमा तनाव सिर्जना भएको हो । मृतकका परिवार र आफन्तले उपचारमा संलग्न चिकित्सकले लापर्बाही गरेको भन्दै कारबाहीको माग गरिरहेका थिए । यसैक्रममा आज विहान अस्पतालका प्रमुख मेडिकल सुपरिन्टेन्डेन्ट डा. निराजन सुवेदी सहितका चिकित्सकहरुमाथि हातपातको प्रयास, दुव्र्यवहार र ज्यान मार्ने धम्कीसम्म दिइएपछि दोषीमाथि कारवाही र सुरक्षाको माग गर्दै अस्पतालका चिकित्सकहरु समेत आन्दोलनमा उत्रिएका छन् ।

बैजनाथ गाउँपालिका वडा नं. ६ बाँकेकी ६२ वर्षीया दिलसरा विकको मृत्युको विषयलाई लिएर आज विहान साढे १० बजे एउटा समूह डा.सुवेदीको कार्यकक्षमा पुगेर हातपातको प्रयास गर्नुका साथै तथानाम गाली वेइज्जती गरेको प्रत्यक्षदर्शी चिकित्सकहरुले बताए । त्यस्तै प्रमुख कन्सल्टेन्ट फिजिसियन डा. राजन पाण्डे लगायतका चिकित्सकहरुलाई ज्यान मार्ने धम्की दिएको अस्पताल प्रशासनले जनाएको छ ।

संलग्नहरुलाई कारवाही र सम्पूर्ण चिकित्सक तथा स्वास्थ्यकर्मीहरुको सुरक्षाको पूर्ण ग्यारेन्टी नभएसम्म विरामीको सेवामा फर्किने अवस्था नरहेको अस्पतालका प्रमुख मेडिकल सुपरिन्टेन्डेन्ट डा. सुवेदीले बताए । ‘उपचारका क्रममा विरामीको मृत्यु हुँदा हामीलाई पनि दुःख लागेको छ, तर उपचार प्रक्रियामा असहमत भए, चित्त नबुझे कानुनी प्रक्रियामा जाने ठाउँ हुँदाहुँदै चिकित्सकमाथि आक्रमणको प्रयास हुनु, धम्की दिनु स्वभनीय होइन,' उनले भने–‘यसले सम्पूर्ण चिकित्सकको मनोवल गिरेको छ । त्रासको अवस्था सिर्जना भएको छ । दोषीलाई कारवाही र सुरक्षाको पूर्ण ग्यारेन्टी नभएसम्म काममा फर्किने अवस्था छैन ।’ इमरजेन्सी बाहेक अन्य सबै सेवा ठप्प पारेर आजदेखि चिकित्सकहरु आन्दोलनमा उत्रिएका छन् ।

अस्पतालका प्रमख कन्सल्टेन्ट फिजिसियन डा. पाण्डे पनि चिकित्सकहरु त्रासमा रहेको बताए । अस्पतालको उपचार प्रक्रियामा चित्त नबुझे कानुनी बाटो खुला हुँदा पनि चिकित्सकमाथि हातपातको प्रयास हुनु निन्दनीय भएको उनले बताए । उनले चिकित्सक पनि दोषी भए कानुनी कारवाही भोग्न तयार रहेको बताए । कानुनी उपचारमा जाने गरी सहमति भइसकेको केशमा आज पीडितका आफन्तहरुबाट भएको हर्कत सिंगो चिकित्सा क्षेत्रका लागि सह्य नभएको उनले चेतावनी दिए ।

प्रतिनिधिसभा सदस्य खगेन्द्र सुनार समेतको सहजीकरणमा सोमवार चिकित्सक र मृतकका आफन्तबीच भएको छलफलमा उपचारमा संलग्न चिकित्सकमाथि कानुनी उपचार खोज्ने र, आज मंगलवार शव पोष्टमार्टम गरेर पीडितका आफन्तहरुले बुझ्ने सहमति भएको बताइएको थियो । त्यही अनुसार पीडित परिवारले उपचारमा संलग्न चिकित्सकमाथि कारवाहीको माग गर्दै सोमवार प्रहरीमा जाहेरी समेत दिइसकेका छन् ।

तर, सहमति भइसकेको विषयमा अचानक आफ्नो कार्यकक्षमा प्रवेश गरेर मृतकका छोरा सुरेश विक लगायतको समूहले आफूमाथि हातपातको प्रयास गरेको डा. सुवेदीको भनाई छ । सुरेशले भने आफूले हातपात नगरेको दावी गरेका छन् । उनले शव बुझेर लगिसकेको बताए । गएको ६ गते उपचारका लागि अस्पताल भर्ना भएकी विकको १३ गते मृत्यु भएको थियो ।

यस्तो छ भेरी अस्पताल प्रशासनको विज्ञप्ती

May be an image of text