रास्वपाद्वारा नेपालगञ्जमा रक्तदान कार्यक्रम आयोजना, ८४ पिन्ट रगत संकलन

स्वास्थ्य

गृहपृष्ठ
स्वास्थ्य
रास्वपाद्वारा नेपालगञ्जमा रक्तदान कार्यक्रम आयोजना, ८४ पिन्ट रगत संकलन

रास्वपाद्वारा नेपालगञ्जमा रक्तदान कार्यक्रम आयोजना, ८४ पिन्ट रगत संकलन

शनिबार, वैशाख १९, २०८३ बागेश्वरी पोस्ट

नेपालगञ्ज । राष्ट्रिय स्वतन्त्र पार्टी बाँकेले आयोजना गरेको रक्तदान कार्यक्रममा ८४ पिन्ट रगत संकलन भएको छ । “रक्तदान जीवनदान” भन्ने नारासहित जिल्लामा देखिँदै आएको रगत अभाव न्यूनीकरण गर्ने उद्देश्यले कार्यक्रम सञ्चालन गरिएको हो । कार्यक्रममा ८४ जनाले रक्तदान गरेको जानकारी संयोजक दन्त चिकित्सक डा. प्रतिक श्रेष्ठले दिए । नेपाल रेडक्रस सोसाइटी प्रादेशिक रक्तसञ्चार केन्द्रसँगको सहकार्यमा सम्पन्न कार्यक्रममा विशेषगरी युवाहरूको उल्लेखनीय सहभागिता देखिएको थियो ।

नगर सभापति नवीन खड्काको सभापतित्वमा सम्पन्न कार्यक्रममा प्रमुख अतिथिका रूपमा प्रतिनिधिसभा सदस्य शुष्मा स्वर्णकार, क्षेत्रीय सभापति विवेक कुमार श्रेष्ठ लगायतको उपस्थिति रहेको थियो । कार्यक्रमको संयोजन डा. श्रेष्ठसँगै किरण कुमार श्रेष्ठ र सौरभ कर्माचार्यले गरेका थिए । संयोजक डा. श्रेष्ठले मानव जीवन रक्षा तथा सामाजिक उत्तरदायित्वको भावनालाई सुदृढ बनाउने उद्देश्यले कार्यक्रम आयोजना गरिएको बताए । युवाहरूको सक्रिय सहभागिताले अभियान सफल भएको महसुस भएको उनले उल्लेख गरे ।

बाँकेका विभिन्न अस्पतालहरूमा पश्चिम नेपालका जिल्लाबाट उपचारका लागि आउने बिरामीको चाप उच्च रहे पनि माग अनुसार रगत संकलन हुन नसक्दा बेला–बेलामा रगत अभाव हुने गरेको छ । यस्ता कार्यक्रमले रक्त अभाव न्यूनीकरणमा महत्वपूर्ण योगदान पुर्‍याउने विश्वास व्यक्त गरिएको छ ।

प्रकाशित मिति: शनिबार, वैशाख १९, २०८३ १७:१९

प्रतिक्रिया दिनुहोस्