स्थापना दिवसमा थोपा प्रयोगशालाद्वारा रक्तदान कार्यक्रमः ४६ पिन्ट रगत संकलन

स्वास्थ्य

गृहपृष्ठ
स्वास्थ्य
स्थापना दिवसमा थोपा प्रयोगशालाद्वारा रक्तदान कार्यक्रमः ४६ पिन्ट रगत संकलन

स्थापना दिवसमा थोपा प्रयोगशालाद्वारा रक्तदान कार्यक्रमः ४६ पिन्ट रगत संकलन

बुधबार, असार ३, २०८३ बागेश्वरी पोस्ट

नेपालगञ्ज । आफ्नो स्थापना दिवसको अवसर पारेर थोपा प्रयोगशाला, मलमपट्टी क्लिनिक्स र ओख्तो फार्मेसीले आयोजना गरेको रक्तदान कार्यक्रममा ४६ जनाले रक्तदान गरेका छन् । सामाजिक उत्तरदायित्वलाई प्राथमिकतामा राख्दै संस्थाले रक्तदान कार्यक्रम आयोजना गरेको हो ।

प्रादेशिक रक्तसञ्चार केन्द्र नेपालगञ्जसँगको सहकार्यमा सम्पन्न कार्यक्रममा चिकित्सक, प्रयोगशालाकर्मी, औषधि कम्पनीका बजार प्रतिनिधि, बजार व्यवस्थापक तथा विभिन्न पेशा व्यवसायमा आबद्ध व्यक्तिहरूको उत्साहजनक सहभागिता रहेको थियो । थोपा प्रयोगशालाका प्रेमिसिस इन्चार्ज हरि बुढाका अनुसार कार्यक्रमबाट ४६ युनिट रगत संकलन भएको छ ।

थोपा प्रयोगशालाका अध्यक्ष गोविन्द प्रकाश रोकाले बिरामीले रगतको अभावमा दुःख पाउन नपरोस् भन्ने उद्देश्यले रक्तदान कार्यक्रम आयोजना गरिएको बताए । “स्थापना दिवसलाई केवल उत्सवका रूपमा नभई समाजप्रति उत्तरदायी बन्ने अवसरका रूपमा लिएका छौं । रक्तदानमार्फत धेरै बिरामीको जीवन बचाउन सहयोग पुग्ने विश्वास गरेका छौं,” उनले भने ।

करिब चार वर्षअघि सञ्चालनमा आएको थोपा प्रयोगशालाले राष्ट्रिय जनस्वास्थ्य प्रयोगशालाबाट ‘बी’ वर्गको मान्यता प्राप्त गरी नेपालगञ्जबाट गुणस्तरीय प्रयोगशाला सेवा प्रदान गर्दै आएको छ । विगतमा कतिपय विशेष परीक्षणका लागि काठमाडौं तथा भारतका विभिन्न शहरमा निर्भर रहनुपर्ने अवस्था रहेकामा अत्याधुनिक प्रविधि भित्र्याएर त्यसलाई न्यूनीकरण गर्ने लक्ष्यसहित प्रयोगशाला स्थापना गरिएको संस्थाले जनाएको छ ।

हाल प्रयोगशालामा विश्वस्तरीय प्रविधिमार्फत थाइराइड फङ्सन टेस्ट, ट्युमर मार्कर, फर्टिलिटी हर्मोन टेस्ट, इन्फेक्सियस डिजिज टेस्ट, एलर्जी परीक्षण लगायत विभिन्न विशेष परीक्षणहरू सञ्चालन भइरहेका छन् । प्रयोगशाला विज्ञ सुलभ आचार्यका अनुसार प्रयोगशालामा प्रयोग भइरहेका अधिकांश उपकरणहरू अन्तर्राष्ट्रिय मान्यता प्राप्त यूएस–एफडीए स्वीकृत छन्, जसले परीक्षण प्रतिवेदनको शुद्धता र विश्वसनीयता सुनिश्चित गर्छ ।

थोपा भवनभित्र बिरामीको सुविधालाई मध्यनजर गर्दै मलमपट्टी क्लिनिक्स र ओख्तो फार्मेसी समेत सञ्चालनमा रहेका छन् । स्वास्थ्य सेवासँगै सेवाग्राहीलाई सहज वातावरण प्रदान गर्ने उद्देश्यले परिसरभित्र ‘कफी ड्रप्स’ समेत सञ्चालन गरिएको संस्थाले जनाएको छ ।

स्थापनाकालदेखि नै गुणस्तरीय स्वास्थ्य सेवा, आधुनिक प्रविधि र सामाजिक उत्तरदायित्वलाई प्राथमिकतामा राख्दै आएको थोपा प्रयोगशालाले आगामी दिनमा पनि स्वास्थ्य क्षेत्रमा थप योगदान पुर्‍याउने प्रतिबद्धता जनाएको छ ।

प्रकाशित मिति: बुधबार, असार ३, २०८३ २१:५६

प्रतिक्रिया दिनुहोस्