सम्झना चोकदेखि खजुरा क्यान्सर गेटसम्म नगर बस संचालन हुँदै

स्वास्थ्य

गृहपृष्ठ
स्वास्थ्य
सम्झना चोकदेखि खजुरा क्यान्सर गेटसम्म नगर बस संचालन हुँदै

सम्झना चोकदेखि खजुरा क्यान्सर गेटसम्म नगर बस संचालन हुँदै

शुक्रबार, साउन ८, २०८३ बागेश्वरी पोस्ट

खजुरा । बागेश्वरी यातायात प्रालिले बैजनाथ गाउँपालिकाको सम्झना चौकदेखि खजुरास्थित सुशिल कोइराला प्रखर क्यान्सर अस्पतालसम्म नगर बस संचालन गर्ने भएको छ । क्यान्सर अस्पतालको आग्रहमा क्यान्सरका बिरामीहरुको सहजतालाई मध्यनजर गर्दै बागेश्वरी यातायतले क्यान्सर गेटसम्म पुग्ने गरी नगर बस संचालन गर्ने भएको हो ।

आज अस्पताल परिसरमा अस्पतालका कार्यकारी निर्देशक डा .निरज भट्टराई र बागेश्वरी यातायत प्रालिका अध्यक्ष मन प्रसाद आचार्यबीच नगर बस संचालन सम्बन्धी सहमति भएको नेपाल यातायात व्यवसायी राष्ट्रिय महासंघका सहकोषाध्यक्ष शोभाखर पौडेलले जानकारी दिए ।

अस्पतालमा जान आएका दुरदराजका बिरामीहरुले भोग्दै आएको समस्याको सहजीकरणका लागि अस्पतालको आग्रहमा बस संचालन गर्न थालिएको बागेश्वरी यातायातका अध्यक्ष आचार्यले बताए । उनले पहिलो चरणमा सम्झना चौकबाट क्यान्सर गेटसम्म २ वटा बस संचालन गरिने बताउँदै बिरामीको चाप र आवश्यकतालाई हेरेर पछि सेवा थप गर्न सकिने जनाए ।

अस्पतालसम्म सिधै आउने साधन नपाएर अलमलमा पर्ने गरेका बिरामीहरुलाई नगर बस संचालनले ठूलो राहत मिल्ने अस्पतालका कार्यकारी निर्देशक डा. भट्टराईले बताए । अस्पतालको आग्रहलाई स्वीकार गरेर बस संचालन गर्ने सहमति भएकोमा उनले बागेश्वरी यातायात प्रालि परिवारलाई अस्पतालको तर्फबाट धन्यवाद व्यक्त गरे ।

अध्यक्ष आचार्यका अनुसार अर्को सातादेखि संचालन हुने नगर बसले खजुराबाट नेपालगञ्जका लागि ४० रुपैयाँ, राँझा चोकलाई ५० रुपैयाँ, कोहलपुरसम्मका लागि १ सय रुपैयाँ र सम्झना चोकसम्मका लागि १२५ रुपैयाँ सेवा शुल्क लिइनेछ ।

कर्णाली, सुदूरपश्चिम तथा लुम्बिनी प्रदेशका बिभिन्न जिल्लाबाट क्यान्सरको उपचार गर्न खजुरा क्यान्सर अस्पताल आउने बिरामीहरुले अस्पतासम्म पुग्ने साधन नपाउँदा समस्या भोग्दै आएका थिए ।

प्रकाशित मिति: शुक्रबार, साउन ८, २०८३ २०:०४

प्रतिक्रिया दिनुहोस्