बाँकेमा रक्तसंचार सेवा दिवस मनाइयो

स्वास्थ्य

गृहपृष्ठ
स्वास्थ्य
बाँकेमा रक्तसंचार सेवा दिवस मनाइयो

बाँकेमा रक्तसंचार सेवा दिवस मनाइयो

मंगलबार, साउन १२, २०८३ बागेश्वरी पोस्ट

नेपालगञ्ज । नेपाल रेडक्रस सोसाइटी बाँके जिल्ला शाखाले ६१औँ रक्तसंचार सेवा स्थापना दिवस विभिन्न कार्यक्रमसहित मंगलबार नेपालगञ्जमा मनाएको छ । दिवसका अवसरमा नेपाल रेडक्रस सोसाइटी बाँके शाखाका सभापति गोवर्धन सिंह सम्झनाले शुभकामना सन्देश दिँदै जिल्लामा अस्पतालको संख्या र बिरामीको चाप बढेसँगै रगतको माग पनि निरन्तर बढ्दै गएको बताए । उनले स्वयंसेवी तथा संस्थागत रक्तदाताप्रति आभार व्यक्त गर्दै रक्तदानलाई मानवीय सेवाको उत्कृष्ट उदाहरण भएको उल्लेख गरे ।

दिवसको अवसरमा नेपाल रेडक्रस सोसाइटी प्रादेशिक रक्तसञ्चार सेवा केन्द्र नेपालगञ्ज तथा कोहलपुर र खजुरा रक्तसञ्चार सेवा इकाइमा सप्ताहव्यापी खुला रक्तदान कार्यक्रम सञ्चालन भइरहेको छ । सप्ताहव्यापी अभियान अन्तर्गत अछामी सेवा समाज बाँकेले ५१ पिन्ट, राष्ट्रिय स्वतन्त्र पार्टी कोहलपुरले ८१ पिन्ट तथा भेरी अस्पताल नेपालगञ्जले आफ्नो १३६औँ वार्षिकोत्सवको अवसरमा ३३ पिन्ट रगत संकलन गरेका छन् । यस्तै, बुधबार एक्टिभ युवा क्लब खजुराले पनि रक्तदान कार्यक्रम आयोजना गर्ने जनाएको छ ।

प्रादेशिक रक्तसञ्चार सेवा केन्द्र नेपालगञ्जका प्रमुख उपेन्द्र रेग्मीका अनुसार आर्थिक वर्ष २०८२/८३ मा केन्द्रबाट २४ हजार ५ सय २६ पिन्ट रगत वितरण गरिएको छ । नेपालगञ्ज, कोहलपुर र खजुरा क्षेत्रमा रहेका २२ वटा अस्पतालमार्फत चिकित्सकको सिफारिसका आधारमा बिरामीलाई रगत उपलब्ध गराइएको उनले जानकारी दिए ।

बाँके स्वास्थ्य सेवाको प्रमुख केन्द्र (हब) का रूपमा स्थापित भएकाले लुम्बिनी, कर्णाली र सुदूरपश्चिम प्रदेशका ठूलो संख्यामा बिरामी उपचारका लागि यहाँ आउने गरेका छन् । त्यसैले जिल्लामा सुरक्षित र पर्याप्त रक्त सञ्चार सेवाको आवश्यकता झन् बढ्दै गएको छ ।

नेपाल रेडक्रस सोसाइटी बाँके जिल्ला शाखाले हाल तीन स्थानबाट रक्तसञ्चार सेवा सञ्चालन गरिरहेको छ । प्रादेशिक रक्तसञ्चार सेवा केन्द्र नेपालगञ्ज, कोहलपुर मेडिकल कलेज शिक्षण अस्पतालस्थित रक्तसञ्चार सेवा इकाई तथा सुशील कोइराला प्रखर क्यान्सर अस्पताल, खजुरास्थित रक्तसञ्चार सेवा इकाइमार्फत नियमित रूपमा रक्तसञ्चार सेवा प्रदान हुँदै आएको छ ।

प्रकाशित मिति: मंगलबार, साउन १२, २०८३ १८:००

प्रतिक्रिया दिनुहोस्