डुडुवाको कुड्वामा स्वास्थ्य इकाई स्थापना

स्वास्थ्य

गृहपृष्ठ
स्वास्थ्य
डुडुवाको कुड्वामा स्वास्थ्य इकाई स्थापना

डुडुवाको कुड्वामा स्वास्थ्य इकाई स्थापना

शुक्रबार, मंसिर ५, २०७७ बागेश्वरी पोस्ट

डुडुवा (बाँके) । स्वास्थ्य सेवाको पहुँचबाट बञ्चित रहेको बाँके डुडुवा गाउँपालिका वडा नंं. १ कुड्वामा सामुदायिक स्वास्थ्य इकाई स्थापना गरिएको छ । स्थानीय रामनरेश मौर्यले नि:शुल्करुपमा उपलब्ध गराउनुभएको दुई कोठे घरमा स्थापना गरिएको इकाईको आज गाउँपालिका अध्यक्ष नरेन्द्रकुमार चौधरीले उद्घाटन गर्नुभयो ।

उद्घाटन गर्दै अध्यक्ष चौधरीले गाउँपालिकाले संचालन गरेको घर घरमा स्वास्थ्य अभियानलाई सफल पार्न र सेवाबाट बञ्चित तथा पछाडि परेको समुदायलाई समेट्ने उद्देश्यले इकाई संचालनमा ल्याएको बताउनुभयो । उहाँले गाउँपालिका अन्तरगत् कुनै पनि समुदाय तथा बस्ती टोलका पछाडि पारिएका नागरिकलाई सेवाबाट बञ्चित नगराई प्रभावकारी सेवा प्रदान गर्ने योजना अनुरुप अघि बढेको बताउनुभयो ।

अध्यक्ष चौधरीले गाउँपालिकाको वडा नं. ५ मा पनि केही बस्तीमा स्वास्थ्य इकाई स्थापना गर्ने बताउनुभयो । कुड्वाका नागरिकहरु राप्ती नदी वारपार गरेर हालिया र नरैनापुर गाउँपालिकाको गंगापुर स्वास्थ्य चौकीबाट सेवा लिंँदै आएका थिए । स्वास्थ्य सेवा इकाई संचालनमा आएपछि उक्त समस्याको अन्त्य हुने स्वास्थ्य शाखा संयोजक धनबहादुर बुढाले बताउनुभयो । उहाँका अनुसार सोही स्थानमा बालबालिकाहरुका लागि खोप केन्द्र संचालन गर्न भवन समेत निर्माण भइरहेको छ ।

इकाईबाट सो बस्तीका करिब ९० घरपरिवार प्रत्यक्ष लाभान्वित हुने गाउँपालिकाले जनाएको छ । इकाईमा औषधिसहित दुई जना स्वास्थ्यकर्मी परिचालन गती सेवा आजैबाट शुरु गरिएको छ । उद्घाटन कार्यक्रममा गाउँपालिका उपाध्यक्ष शाहिदा बानो, वडाध्यक्ष पटेश्वर कुर्मी, कार्यपालिका सदस्य लिलावती यादव लगायतको उपस्थिति रहेको थियो ।

प्रकाशित मिति: शुक्रबार, मंसिर ५, २०७७ १९:१७

प्रतिक्रिया दिनुहोस्