जमुनाहा नाकामा स्थायी हेल्थ डेस्क सञ्चालन हुने

स्वास्थ्य

गृहपृष्ठ
स्वास्थ्य
जमुनाहा नाकामा स्थायी हेल्थ डेस्क सञ्चालन हुने

जमुनाहा नाकामा स्थायी हेल्थ डेस्क सञ्चालन हुने

सोमबार, मंसिर २९, २०७७ बागेश्वरी पोस्ट

नेपालगञ्ज । नेपालगञ्जस्थित जमुनाहा नाकामा स्थायीरुपमा हेल्थ डेस्क स्थापना हुने भएको छ । ५० लाखको लागतमा नाकामा स्थायी संरचना निर्माण गर्न लागिएको छ ।

स्वास्थ्य तथा जनसंख्या मन्त्रालय अन्तर्गत्को इपिडिमियोलोजी तथा रोग नियन्त्रण महाशाखाले स्वास्थ्यकर्मीको दरबन्दी समेत स्वीकृत गरिसकेको छ । कोभिड–१९ लगायत अन्य संक्रामक रोगको नियन्त्रणका लागि नाकामा चिकित्सकसहित स्वास्थ्यकर्मी परिचालन हुन्छन् । हेल्थ डेस्कमा प्रयोगशाला समेत रहने भएको छ । नेपालगञ्ज उपमहानगरपालिकाका प्रमुख प्रशासकीय अधिकृत ओमबहादुर खड्का, स्वास्थ्य शाखा प्रमुख रामवहादुर चन्द सहितको टोलीले हेल्थ डेस्क निर्माण गरिने स्थानको आज स्थलगत अनुगमन गरी जानकारी लिएको छ ।

स्वास्थ्य शाखा प्रमुख चन्दले स्थायी संरचना तयार नहुन्जेलसम्मका लागि स्वास्थ्यका लागि सक्षम प्रणाली नामक संस्थाको सुविधा सम्पन्न अस्थायी संरचना तथा अन्य प्राविधिक सहयोगमा हेल्थ डेस्कको काम सुरु गर्न लागिएको जानकारी दिनुभयो । स्वास्थ्यका लागि सक्षम प्रणालीका प्राविधिक अधिकृत सावित्री भट्टले उपमहानगरपालिकासँग समनवय गरी काम गर्न लागिएको बताउनुभयो ।

उपमहानगरपालिकाका प्रमुख प्रशासकीय अधिकृत खड्का, स्वास्थ्य शाखा प्रमुख चन्द सहितको टोलीले आज नै वडा नम्बर ४ मा रहेको शहरी स्वास्थ्य क्लिनिक र निर्माणाधीन स्वास्थ्य केन्द्र भवनको स्थलगत अनुगमन गरी जानकारी लिएको छ । सो अवसरमा प्रमुख प्रशासकीय अधिकृत खड्काले स्वास्थ्य संस्थामा औषधिको पर्याप्तता लगायतका विषयमा स्वास्थ्यकर्मीसँग जानकारी लिनुभएको थियो ।

प्रकाशित मिति: सोमबार, मंसिर २९, २०७७ १७:३९

प्रतिक्रिया दिनुहोस्