बाँकेलाई फागुनभित्र पूर्ण खोपयुक्त जिल्ला घोषणा गर्ने तयारी

स्वास्थ्य

गृहपृष्ठ
स्वास्थ्य
बाँकेलाई फागुनभित्र पूर्ण खोपयुक्त जिल्ला घोषणा गर्ने तयारी

बाँकेलाई फागुनभित्र पूर्ण खोपयुक्त जिल्ला घोषणा गर्ने तयारी

सोमबार, पुस ६, २०७७ बागेश्वरी पोस्ट

नेपालगञ्ज । बाँके जिल्लालाई आगामी फागुन मसान्तभित्र पूर्ण खोपयुक्त जिल्ला घोषणा गर्ने तयारी छ । फागुन १० गतेभित्र पूर्ण खोपयुक्त घोषणा हुन बाँकि तीन वटा पालिकालाई खोपयुक्त घोषणा गरी फागुन मसान्तभित्र जिल्लालाई घोषणा गर्ने तयारी गरिएको हो ।

नेपालगञ्जमा आज बाँकेका आठ वटै स्थानीय तहका प्रमुख, उपप्रमुख, प्रमुख प्रशासकीय अधिकृत र स्वास्थ्य शाखा प्रमुखहरु उपस्थित गोष्ठीमा स्वास्थ्य कार्यालय बाँकेका प्रमुख धिरजंग शाहले खोपयुक्त जिल्ला घोषणा गर्ने लक्ष्यलाई सफल बनाउन आग्रह गर्नुभयो । जिल्ला पूर्ण खोप समन्वय समिति एवम् स्वास्थ्य कार्यालय बाँकेको आयोजनामा भएको गोष्ठीमा जिल्लामा खोपको अवस्थाबारे खोप अधिकृत भेषराज शर्माले प्रस्तुतिकरण गर्नुभएको थियो ।

नेपालगञ्ज उपमहागरपालिका, कोहलपुर नगरपालिका, खजुरा गाउँपालिका, डुडुवा गाउँपालिका र जानकी गाउँपालिका पूर्ण खोपयुक्त पालिका घोषणा भएपनि नरैनापुर, राप्तीसोनारी र बैजनाथ घोषणा हुन बाँकि छन् । गोष्ठीमा बोल्दै लुम्बिनी प्रदेशसभा सदस्य सुरेन्द्र हमालले कुनै पनि बालबालिकालाई खोपबाट बञ्चित हुन नदिन सबै प्रतिबद्ध हुनुपर्नेमा जोड दिनुभयो ।

जिल्ला पूर्ण खोप समन्वय समितिका संयोजक एवम् जिल्ला समन्वय समितिका प्रमुख अजय कुमार श्रीवास्तवले आफ्नो पालिकालाई निर्धारित मितिमै खोपयुक्त बनाउन स्थानीय तहहरुलाई प्रतिबद्ध भई काम गर्न आग्रह गर्नुभयो । गोष्ठीमा कोहलपुर नगरपालिकाका मेयर लुट बहादुर रावत, नरैनापुर गाउँपालिकाका अध्यक्ष इस्तियाक अहमद शाह, बैजनाथ गाउँपालिकाका अध्यक्ष मान बहादुर रुचाल ठकुरी, जानकी गाउँपालिकाकी उपाध्यक्ष भूमीसरा धिताल लगायतको उपस्थिति थियो । त्यसक्रममा प्रतिबद्धतापत्रमा हस्ताक्षर गरिएको थियो ।

नेपालमा जन्मेदेखि १५ महिनासम्मका बालबालिकालाई १२ वटा रोग विरुद्धका १२ वटा खोप लगाउने गरिएको छ ।