बुटवलस्थित कोरोना अस्पतालबाट एक जना संक्रमित फरार

स्वास्थ्य

गृहपृष्ठ
स्वास्थ्य
बुटवलस्थित कोरोना अस्पतालबाट एक जना संक्रमित फरार

बुटवलस्थित कोरोना अस्पतालबाट एक जना संक्रमित फरार

आइतबार, पुस १२, २०७७ बागेश्वरी पोस्ट

सांंकेतिक तस्बिर

बुटवल ।कोरोना विशेष अस्पतालको आइसोलेसनबाट एक जना कोरोना संक्रमित बिरामी फरार भएका छन्। बुटवल धागो कारखानामा सञ्चालन भएको कोरोना विशेष अस्पतालको आइसियूमा भर्ना भएका ती संक्रमित आज बिहान फरार भएको अस्पतालले जानकारी दिएको छ।

अस्पतालका अनुसार बुटवल १३ बेलबासका ५५ वर्षीय पुरूष आज बिहानै साढे ५ बजेतिर अस्पतालको शौचालयबाट फरार भएका हुन् । शौचालय जाने भनेर गएका ती संक्रमित पुरुष भागेको अस्पतालले जानकारी दिएको छ।उनलाई पुस ८ गतेदेखि कोरोना अस्पतालको आइसियूमा भर्ना गरिएको थियो। फरार रहेका ती पुरुषको खोजी भइरहेको अस्पतालले जनाएको छ। फरार ती पुरुष राजमार्ग पार गरेर जंगलभित्र पसेपछि नियन्त्रणमा लिन नसकिएको अस्पतालले जानकारी दिएको छ।

संक्रमित ब्यक्ति फरार भएको बारेमा अस्पतालले प्रहरीलाई जानकारी गराए पनि अहिलेसम्म ती पुरुषको कुनै जानकारी हुन नसकेको प्रहरीले बताएको छ। ती पुरुषका परिवारका सदस्यले उनी मानसिक औषधी सेवन गरिरहेकाले राम्रो तरिकाले निगरानी गरिदिन अनुरोध गरे अनुसार उनलाई निगरानीमा राखिएको अस्पतालले जनाएको छ। यता बिरामीका आफन्तले भने अस्पतालको लापरबाहीको कारण र शौचालयमा जाँदा पनि एक्लै जान दिएको बिरामी हराएको आरोप लगाएका छन्।

प्रकाशित मिति: आइतबार, पुस १२, २०७७ १३:२४