बर्दियाका स्वास्थ्य संस्थामा खानेपानी, सरसफाई र स्वच्छता निकै कमजोर

स्वास्थ्य

गृहपृष्ठ
स्वास्थ्य
बर्दियाका स्वास्थ्य संस्थामा खानेपानी, सरसफाई र स्वच्छता निकै कमजोर

बर्दियाका स्वास्थ्य संस्थामा खानेपानी, सरसफाई र स्वच्छता निकै कमजोर

सोमबार, पुस १३, २०७७ बागेश्वरी पोस्ट

गुलरिया । बर्दियाका स्वास्थ्य संस्थाले खानेपानी, सरसफाई तथा स्वच्छतामा न्यूनतम् मापदण्ड पूरा नगरेको पाइएको छ । हालै जिल्लाका २५ वटा स्वास्थ्य संस्थामा गरिएको अध्ययनमा स्वास्थ्य संस्थाहरु योजना र बजेट विनै सञ्चालनमा रहेको पाइएको हो ।

स्वास्थ्य सुरक्षाका न्यूनतम् मापदण्ड पनि नअपनाएको अध्ययनले देखाएको छ । टिडिएच फाउण्डेशनको आर्थिक सहयोगमा गेरुवा ग्रामीण जागरण संघद्वारा सञ्चालित प्रयास परियोजनाले गुलरियामा गरेको स्वास्थ्य सेवा प्रदायक संस्थामा खानेपानी, सरसफाई तथा स्वच्छता विषयमा सञ्चारकर्मीहरुसंग गरेको पैरवी कार्यक्रममा परामर्शदाता हरि सुवदीले स्थलगत अनुगमन गरिएका २५ वटा स्वास्थ्य संस्था मध्ये राजापुरको बदालपुर स्वास्थ्य चौकीमा सबैभन्दा बढी ६२ प्रतिशत मापदण्ड पूरा गरेको बताउनुभयो । उहाँका अनुसार सबैभन्दा कमजोेर अवस्थामा पशुपतिनगर स्वास्थ्य चौकी छ । जसले २० प्रतिशत मात्रै मापदण्ड पूरा गरेको छ ।

विश्व स्वास्थ्य संगठन र युनिसेफले विभिन्न देशका स्वास्थ्य संस्थाहरुको खानेपानी, सरसफाई र स्वच्छताको अवस्था अध्ययन गर्न तयार पारेको वास फिट विधिमा आधारित रहेर ५३ वटा सूचकबाट गरेको अनुगमनले अधिकांश स्वास्थ्य संस्थाको अवस्था कमजोर देखाएको सुवेदीले बताउनुभयो । कार्यक्रमका प्रमुख अतिथि स्वास्थ्य कार्यालय बर्दियाका प्रमुख गोकर्ण गिरीले कोभिडपछि सरसफाईमा सुधार आएको देखिए पनि अझै धेरै सुधारको जरुरी रहेको बताउनुभयो ।

गेरुवा ग्रामीण जागरण संघकी उपाध्यक्ष सावित्रा गौतमको अध्यक्षतामा भएको कार्यक्रममा पूर्व अध्यक्ष एवम् प्रयास परियोजनाका फोकल पर्सन लक्ष्मण चौधरी, नेपाल पत्रकार महासंघ बर्दियाका अध्यक्ष राजेन्द्र धिताल, विविसी संवाददाता विमला चौधरी, परियोजना संयोजक गोपाल कँडेलले बोल्नुभएको थियो । कार्यक्रममा बाँके र बर्दियाका पत्रकारहरु सहभागी थिए ।