कोरोना खोपको व्यवस्थापनका लागि सातवटै प्रदेशमा संयोजक तोकिए

स्वास्थ्य

गृहपृष्ठ
स्वास्थ्य
कोरोना खोपको व्यवस्थापनका लागि सातवटै प्रदेशमा संयोजक तोकिए

कोरोना खोपको व्यवस्थापनका लागि सातवटै प्रदेशमा संयोजक तोकिए

शनिबार, माघ १०, २०७७ बागेश्वरी पोस्ट

स्वास्थ्य तथा जनसंख्या मन्त्रालय

नेपालगन्ज । सरकारले कोरोना भाइरस विरुद्धको खोपको व्यवस्थापनका लागि सातवटै प्रदेशमा संयोजक तोकेको छ ।

स्वास्थ्य तथा जनसंख्या मन्त्रालयले कोभिड खोप अभियान सञ्चालनलाई व्यवस्थित बनाउन र खोपको उचित व्यवस्थापनका लागि महाशाखा प्रमुखलाई संयोजकको जिम्मेवारी दिएको हो ।

स्वास्थ्य मन्त्रालयका अनुसार खोप व्यवस्थापनका लागि प्रदेश १ को जिम्मेवारी डा तारानाथ पोखरेललाई दिइएको छ भने डा मदनकुमार उपाध्यायलाई प्रदेश २ को जिम्मेवारी दिइएको छ ।

त्यस्तै बागमती प्रदेशको डा गुणराज लोहनी, गण्डकी प्रदेशमा डा जागेश्वर गौतम, लुम्बिनी प्रदेशमा डा विकास देवकोटा, कर्णाली प्रदेशमा डा अनुज भट्टचन र सुदूरपश्चिम प्रदेशमा डा कृष्ण पौडेललाई संयोजक तोकिएको छ ।

उनीहरुलाई सम्बन्धित प्रदेशमा खोप अभियानका लागि तयारी, खोप लगाउने व्यक्त्तिको नामावली, तयारीका क्रममा हुने समस्या समाधानका लागि सहजीकरण गर्नेलगायतको जिम्मेवारी दिइएको मन्त्रालयले जनाएको छ ।

भारत सरकारले नेपाललाई बिहीबार १० लाख डोज कोभिड खोप उपलब्ध गराएको छ । उक्त खोपलाई आवश्यक तयारी पुरा गरी सबै प्रदेशमा पठाउने तयारी मन्त्रालयले गरेको छ । १४ गते अर्थात बुधबारदेखि सातै प्रदेशमा खोप अभियान सुरु गर्ने सरकारको तयारी छ ।

सरकारले ७७ जिल्लाबाट एकसाथ खोप अभियान सञ्चालन गर्ने तयारी पनि गरेको छ। यसका लागि आवश्यक जनशक्तिलाई तालिम दिने लगायतका काम समेत भइरहेको मन्त्रालयले जनाएको छ।

प्रकाशित मिति: शनिबार, माघ १०, २०७७ १२:५९