डुडुवा पूर्ण खोप सुनिश्चितता तथा दिगोपनामा जिल्लाकै पहिलो पालिका

स्वास्थ्य

गृहपृष्ठ
स्वास्थ्य
डुडुवा पूर्ण खोप सुनिश्चितता तथा दिगोपनामा जिल्लाकै पहिलो पालिका

डुडुवा पूर्ण खोप सुनिश्चितता तथा दिगोपनामा जिल्लाकै पहिलो पालिका

मंगलबार, माघ १३, २०७७ बागेश्वरी पोस्ट

डुडुवा (बाँके) । डुडुवा गाउँपालिका पूर्ण खोप सुनिश्चितता तथा दिगोपनामा जिल्लाकै पहिलो पालिका बनेको छ ।

पालिकाभित्र रहेका सम्पूर्ण बालबालिकाले सबै किसिमका खोपहरु लगाएपछि पालिकालाई जिल्लाकै पहिलो पूर्ण खोप सुनिश्चितता तथा दिगोपना घोषणा गरिएको स्वास्थ्य शाखा प्रमुख धनबहादुर बुढाले जानकारी दिनुभयो । उहाँका अनुसार डुडुवा पहिला नै पूर्ण खोप गाउँपालिका घोषणा भएपनि दिगोपना नभएकाले आजदेखि जिल्लाको पहिलो पालिकाकोरुपमा दिगोपना भएको हो ।

आज आयोजित एक कार्यक्रमका वीच गाउँपालिकाका अध्यक्ष नरेन्द्र कुमार चौधरीले पूर्ण खोप सुनिश्चितता तथा दिगोपनाको घोषणा गर्दै अध्यक्ष चौधरीले गाउँपालिकाका कुनै पनि नागरिक स्वास्थ्य सेवाबाट बञ्चित नहुन् भनेर विशेष अभियानमूलक कार्यक्रम सञ्चालन गरेको बताउनुभयो । उहाँले निःशुल्क औषधि उपचार, प्रयोगशाला जाँच, एम्बुलेन्स सेवा, लगायतका स्वास्थ्य सेवा उपलब्ध गराउँदै आएको भन्दै सेवाबाट बञ्चित भएका नागरिकलाई समेत सेवा उपलब्ध गराएको बताउनुभयो ।

उहाँले स्वास्थ्य क्षेत्रलाई पहिलो प्राथमिकता दिएर पालिकाले काम गरिरहेको भन्दै स्वास्थ्यका क्षेत्रमा कुनै पनि कमी कमजोरी नहुने गरी र सेवाग्राहीलाई सहज तरिकाले सेवा प्रदान गर्न स्वास्थ्यकर्मीहरुलाई निर्देशन समेत दिनुभयो । जन्मेदेखि १५ महिनासम्मका १ हजार ४ सय ४१ जना बालबालिकाले नियमितरुपमा सबै प्रकारका खोपहरु प्राप्त गरेको स्वास्थ्य शाखा प्रमुख बुढाले बताउनुभयो । गाउँपालिकाको वडा नं. १ देखि ६ सम्मका १६ देखि २३ महिनाका जम्मा ७ सय ५१ जना बालबालिका नियमित खोप लिनबाट छुटेका थिए । ती बालबालिकाहरुलाई पनि घरदैलो गरेर खोप लगाएपछि पालिकाभित्र रहेका उमेर पुगेका सबै बालबालिकाले खोप लिएका छन् ।

जिल्लाकै पहिलो पूर्णखोप पालिका भएपछि पूर्ण खोप जिल्ला समितिले दिगोपनाको प्रमाणपत्र प्रदान गरेको छ । स्वास्थ्य कार्यालय बाँकेका कोल्ड चैन निरीक्षक जनक गिरीले उक्त प्रमाणपत्र पालिका प्रमुख चौधरीलाई हस्तान्तरण गर्नुभएको थियो । घोषणा कार्यक्रममा कार्यपालिका सदस्य लिलावति यादव, ढोडे पासी, सुष्मा यादव, सदस्य नेतराम मौर्य लगायतको उपस्थिति रहेको थियो ।

यही फागुन ३० गतेभित्र बाँके जिल्लालाई पुर्ण खोप तथा दिगोपना घोषणा गरिसक्नुपर्नेछ ।

प्रकाशित मिति: मंगलबार, माघ १३, २०७७ १३:३१