नेपालगन्ज मेडिकल कलेजका स्वास्थ्यकर्मीले पनि कोरोना खोप लगाए

स्वास्थ्य

गृहपृष्ठ
स्वास्थ्य
नेपालगन्ज मेडिकल कलेजका स्वास्थ्यकर्मीले पनि कोरोना खोप लगाए

नेपालगन्ज मेडिकल कलेजका स्वास्थ्यकर्मीले पनि कोरोना खोप लगाए

ढुक्क भएर खोप लगाउनुस्: डा. योगी

बिहीबार, माघ १५, २०७७ बागेश्वरी पोस्ट

कोरोना विरुद्धको खोप लगाउँदै डा.योगी

नेपालगन्ज । बाँकेमा कोरोना विरुद्धको खोप लगाउने क्रम चलिरहेको छ । हिजोदेखि खोप लगाउन सुरु गरिएको बाँकेमा आज नेपालगन्ज मेडिकल कलेजका स्वास्थ्यकर्मीहरुले खोप लगाइरहेका छन् । हिजो भेरीका स्वास्थ्यकर्मीकर्मीबाट खोप लगाउन सुरु गरिएको थियो । मेडिकल कलेजका सहायक निर्देशक डा. नितेशकुमार कनोडिया, वरिष्ठ छाती तथा फोक्सो रोग विशेषज्ञ डा. सुभाष योगी, फिजिसियन डा. आसिम किदवाई, हाडजोर्नी विशेषज्ञ डा. गोपालसागर डिसी, प्रशासन अधिकृत कुमार अधिकारी लगायत अन्य चिकित्सक एवम् स्वास्थ्यकर्मीले खोप लगाउनुभएको छ । मेडिकल कलेजका स्वास्थ्यकर्मी र सरसफाईकर्मीले आज र भोलि खोप लगाउनेछन् । खोप लगाइसकेपछि प्रतिक्रिया दिँदै वरिष्ठ छाती तथा फोक्सो रोग विशेषज्ञ डा. योगीले ढुक्क भएर खोप लगाउन आग्रह गर्नुभएको छ । "फ्रन्टलाइनमा बसेर काम गरिरहँदा पहिलो चरणमै खोप लाउन पाएपछि खुशी छु," डा. योगीले भन्नुभयो- "खोप सुरक्षित छ, ढुक्क भएर लगाउनुस् ।" नेपालगन्ज मेडिकल कलेज, नरैनापुर, डुडुवा, बैजनाथ र राप्तीसोनारी गाउँपालिकाका ७ सय ५० जनालाई आज भेरी अस्पतालमा खोप लगाउने कार्यक्रम छ । "स्वास्थ्य संस्था खाली नहुने गरी आधा आधा स्वास्थ्यकर्मी र सरसफाईकर्मीलाई खोप लगाउने तालिका बनाएका छौं, भोलि फेरि यी अस्पताल र पालिकाका बाँकि स्वास्थ्यकर्मी र सरसफाईकर्मीलाई खोप लगाउने लक्ष्य छ ।" कोभिड १९ संकट व्यवस्थापन केन्द्रका फोकल पर्सन तेज वलीले भन्नुभयो। हिजो पहिलो दिन भेरी अस्पतालका स्वास्थ्यकर्मीलाई खोप लगाइएको थियो । त्यहाँ कार्यरत ४ सय जनालाई खोप लगाउने भनिएपनि हिजो १ सय २० जनाले मात्र खोप लगाएका छन् । आज बाँकिलाई पनि खोप लगाइनेछ । यहाँ पहिलो चरणको खोप अभियान माघ २४ गतेसम्म चल्नेछ । पहिलो चरणमा ७ हजार ५ सय जनाले खोप लगाउनेछन् ।