खोप लिएको व्यक्तिबाट पनि कोरोना सर्न सक्ने !

स्वास्थ्य

गृहपृष्ठ
स्वास्थ्य
खोप लिएको व्यक्तिबाट पनि कोरोना सर्न सक्ने !

खोप लिएको व्यक्तिबाट पनि कोरोना सर्न सक्ने !

आइतबार, माघ १८, २०७७ बागेश्वरी पोस्ट

फाइल फोटो

नेपालगञ्ज । खोप लिएको व्यक्तिबाट अन्यलाई भाइरस सर्न सक्ने देखिएको छ । गैरआवासीय नेपाली संघ अन्तर्गत्को स्वास्थ्य समितिका संयोजक सञ्जीव सापकोटाले कोभिड–१९ विरुद्धको खोप लिइसकेको व्यक्तिबाट पनि अन्यलाई भाइरस सर्न सक्ने भन्दै सतर्क रहन सुझाव दिनुभएको छ ।

हालसम्म कुनै पनि खोपको प्रभावकारिता शतप्रतिशत नदेखिएकाले खोप लगाइसकेपछि पनि संक्रमण हुँदैन वा आफूबाट अरुलाई सर्दैन भन्नेमा सुनिश्चित नहुने उहाँको भनाई छ । खोपको दुबै मात्रा प्राप्त गरेका व्यक्तिलाई पनि पुनः संक्रमण भएको देखिएकाले स्वास्थ्य सावधानी अपनाउनुको विकल्प नभएको डा. सापकोटाले बताउनुभयो ।

साथै कोरोना भाइरस संक्रमणबाट विदेशमा थप तीन नेपालीको निधन भएको छ । सापकोटाका अनुसार यो साता बेलायतमा तीन जनाको संक्रमणका कारण निधन भएको हो । यो सहित विदेशमा कोरोना संक्रमणका कारण निधन हुने नेपालीको सङ्ख्या ३ सय ३० जना पुगेको छ । शनिबार साँझसम्म ५० देशमा रहेका ५८ हजार ६ सय ९५ नेपालीमा कोरोना संक्रमण देखिएको छ । ती मध्ये ५५ हजार ७ सय ९३ जना कोरोनामुक्त भएका छन् । यो कूल संक्रमितको ९४ प्रतिशत हो ।

गैरआवासीय नेपाली संघको स्वास्थ्य समितिका अनुसार यो साता बेलायत, मलेसिया, साउदी अरब, पोर्चुगल र नाइजेरियामा रहेका थप नेपालीमा कोरोना भाइरस संक्रमण देखिएको छ । यस्तै कोरोना भाइरसका कारण नेपालमा दुई हजार २७ जनाको निधन भएको छ । नेपालमा कोरोना भाइरसबाट संक्रमण हुनेको सङ्ख्या दुई लाख ७० हजार ८ सय ५४ जना छ भने दुई लाख ६६ हजार ४८ जना अर्थात् ९८.२ प्रतिशत कोरोनामुक्त भएका छन् ।

गैरआवासीय नेपाली संघ अन्तर्गत्को स्वास्थ्य समितिले खोप साक्षरता सम्बन्धि निर्देशिका जारी गरेको छ । आम नेपालीलाई खोपको बारेमा सचेत र सतर्क बनाउने उद्देश्यका साथ जारी यो निर्देशिका सबैले बुझ्ने गरी सरल नेपाली भाषामा छ । सो निर्देशिकामा खोप, खोप लगाउँदा, लगाइसकेपछि अपनाउनुपर्ने सावधानी, खोप लगाइसकेपछि देखिन सक्ने सम्भावित असर वा स्वास्थ्य समस्या र त्यसपछिको स्वास्थ्य मापदण्ड लगायतका विषय समेटिएका छन् ।

प्रकाशित मिति: आइतबार, माघ १८, २०७७ १७:०१

प्रतिक्रिया दिनुहोस्