आयोडिन महिना फेब्रुअरीमा आयोडिनयुक्त प्याकेट नुनको चर्चा

स्वास्थ्य

गृहपृष्ठ
स्वास्थ्य
आयोडिन महिना फेब्रुअरीमा आयोडिनयुक्त प्याकेट नुनको चर्चा

आयोडिन महिना फेब्रुअरीमा आयोडिनयुक्त प्याकेट नुनको चर्चा

मंगलबार, माघ २७, २०७७ बागेश्वरी पोस्ट

नेपालगञ्ज । फेब्रुअरी महिनालाई आइडिन महिनाका रुपमा मनाइन्छ । मानव शरीरलाई आवश्यक पर्ने शुक्ष्म पोषक तत्व आयोडिन सेवन गर्न प्रेरित गर्ने उद्देश्यले फेब्रुअरी महिनामा आयोडिनको विशेष चर्चा हुन्छ । नुन मार्फत् नेपालीहरुका भान्सा भान्सामा आयोडिन पुर्याउने नेपाल सरकारको प्रयासलाई सार्थक बनाउन यो महिनामा अन्तरक्रिया बाक्लै मात्रामा गरिन्छ ।

नेपालगञ्ज उपमहानगरपालिकाको स्वास्थ्य शाखाले पनि आज पत्रकार र सरोकारवालासंग अन्तरक्रिया गरेको छ । त्यस क्रममा मानव शरीरका लागि आयोडिनको आवश्यकता र महत्वका विषयमा चर्चा गरियो । साल्ट ट्रेडिङ कर्पोरेशन लिमिटेड नेपालगञ्ज कार्यालयका प्रमुख मनोज चौधरीले हरेकका भान्सामा दुई बालबालिका चिन्ह अंकित प्याकेटको आयोडिन नुन पुर्याउने प्रयासमा नेपाल सरकार रहेको बताउनुभयो । भारतबाट आउने खुला नुन खानयोग्य नहुने भन्दै उहाँले त्यसलाई विस्थापन गर्न अझै आयोडिनयुक्त ढिका नुन उत्पादन गरेर विक्रि वितरण गर्नुपरिरहेको बताउनुभयो । उहाँले तरकारीमा पहिले नै नुन राख्दा आयोडिन नष्ट हुने भएकाले अन्तिममा नुन राख्नुपर्ने बताउनुभयो ।

नेपालगञ्ज उपमहानगरपालिकाका स्वास्थ्य निरिक्षक जागेश्वर बस्नेतले मानसिक फुर्ति र शारीरिक शक्तिका लागि आयोडिनयुक्त प्याकेट नुन खानुपर्ने बताउँदै उपमहानगरपालिकाले वडा वडामा जनचेतना जगाउन पर्र्चा पम्प्लेट मार्फत् प्रचारप्रसार गरिरहेको जानकारी दिनुभयो । नेपालगञ्ज उपमहानगरपालिका स्वास्थ्य शाखाका तेज ओलीले आयोडिनको महत्व र आवश्यकताबारे प्रस्तुतिकरण दिँदै अहिले पनि ११.९ प्रतिशतले ढिके नुन र ४.१ प्रतिशतले खुलारुपमा विक्रिका लागि राखिएको नुन प्रयोग गरिरहेको तथ्यांक प्रस्तुत गर्नुभयो ।

उपभोक्ता हित संरक्षण मञ्च बाँकेका अध्यक्ष बसन्त गौतमले आयोडिनयुक्त नुन उपभोग गर्न उपभोक्ता जागरुक र सचेत हुनुपर्ने बताउनुभयो । नेपालगञ्ज उपमहानगरपालिकाका स्वास्थ्य शाखा प्रमुख रामबहादुर चन्दले फेबु्रअरी महिनालाई विशेष अभियानका रुपमा लिएर आयोडिनयुक्त नुनको प्रयोग शतप्रतिशत बनाउन उपमहानगरपालिका क्रियाशील रहेको बताउनुभयो ।

प्रकाशित मिति: मंगलबार, माघ २७, २०७७ १५:४४

प्रतिक्रिया दिनुहोस्