लोकतन्त्रको हुर्मत लिन खोज्ने प्रधानमन्त्री ओली पतनको बाटोमा-हृदयराम थानी

राजनीति

गृहपृष्ठ
राजनीति
लोकतन्त्रको हुर्मत लिन खोज्ने प्रधानमन्त्री ओली पतनको बाटोमा-हृदयराम थानी

लोकतन्त्रको हुर्मत लिन खोज्ने प्रधानमन्त्री ओली पतनको बाटोमा-हृदयराम थानी

सोमबार, फागुन ३, २०७७ सौरभ गिरी

नेपालगञ्ज । नेपाली कांग्रेसका केन्द्रिय सदस्य हृदयराम थानीले संविधान र लोकतन्त्रको रक्षाका लागि कांग्रेस सडकमा आएको बताउनुभएको छ । नेपाली कांग्रेस बाँकेले आज नेपालगञ्जमा गरेको विरोधसभालाई सम्बोधन गर्दै केन्द्रिय सदस्य थानीले कम्युनिष्टको घर झगडाका कारण प्रतिनिधिसभा विघटन गर्ने प्रधानमन्त्री केपी शर्मा ओलीको कदम अलोकतान्त्रिक र असंवैधानिक भएको बताउनुभयो ।

पूर्व मन्त्री समेत रहनुभएका थानीले संविधान र लोकतन्त्रको हुर्मत लिन खोज्ने प्रधानमन्त्री ओली पतनको बाटोमा अग्रसर भएको टिप्पणी गर्नुभयो । निरंकुुशता लाद्न खोजिए कांग्रेसका नेता कार्यकर्ता टाउकोमा कफ्फन बाँधेर लड्न तयार रहेको भन्दै उहाँले प्रधानमन्त्री ओलीले दोहोरो कुरा गरिरहेको बताउनुभयो । "एकातिर आफ्नै पार्टीका मान्छेले काम गर्न नदिएर प्रतिनिधिसभा विघटन गरेको हुँ भन्ने अनि अर्कोतिर यो सरकारले इतिहासमै सबैभन्दा राम्रो काम गरेको छ भनेर गफ दिने ?" थानीले प्रश्न गर्नुभयो ।

वर्तमान सरकार भ्रष्टाचारमा चुर्लुम्म डुबेको आरोप लगाउँदै उहाँले अब कम्युनिष्टहरु जनताबाट नांगिने दाबी गर्नुभयो । पार्टी सभापति किरण कोइरालाको सभापतित्वमा भएको विरोधसभामा पूर्व पार्टी सभापति युवराज शर्मा, क्षेत्र नम्बर ३ का क्षेत्रीय सभापति नक्की खाँ, सचिव कपिलदेव शर्माले बोल्नुभएको थियो ।

पार्टी कार्यालयबाट निस्केको जुुलुस विपी चोक हुँदै गणेशमान चोकमा पुगेर विरोधसभामा परिणत भएको थियो । विरोधसभाको सञ्चालन सहसचिव रामकुमार राढले गर्नुभएको थियो । प्रतिनिधिसभा विघटन विरुद्ध कांग्रेसले आज ७७ वटै जिल्लामा विरोध प्रदर्शन र सभा गरेको छ ।