नेपालगन्जबाट बन्यजन्तुका अङ्गसहित तीन जना तस्कर पक्राउ

सुरक्षा-अपराध

गृहपृष्ठ
सुरक्षा-अपराध
नेपालगन्जबाट बन्यजन्तुका अङ्गसहित तीन जना तस्कर पक्राउ

नेपालगन्जबाट बन्यजन्तुका अङ्गसहित तीन जना तस्कर पक्राउ

आइतबार, असार २७, २०७८ सौरभ गिरी

नेपालगन्ज । प्रहरीले नेपालगन्जबाट दुर्लभ बन्यजन्तुको छाला तथा अङ्गसहित तीन जनालाई पक्राउ गरेको छ ।

जिल्ला प्रहरी कार्यालय बाँकेले आज बिहान पत्रकार सम्मेलन गर्दै बरामद गरिएका एक थान रेडपाण्डाको छाला, ४ वटा भालुको पित्तसहित ३ जनालाई सार्वजनिक गरेको हो।

बिशेष सूचनाका आधारमा शनिबार राती पौने ९ बजे लुम्बिनी प्रदेश प्रहरी ब्युरोका प्रहरी नायब निरीक्षक बिष्णु गिरीको कमान्डसहित गएको बाँके प्रहरीको संयुक्त टोलीले नेपालगन्ज वडा नम्बर १ स्थित पुष्पलाल चोकमा रहेको राप्ती गेस्ट हाउसबाट लुकिछिपी बसिरहेको अवस्थामा अङ्ग तथा छालासहित तीन जनालाई पक्राउ गरेको बाँके प्रहरी प्रमुख एसपी श्याम कृष्ण अधिकारीले जानकारी दिएका छन् ।

पक्राउ पर्नेमा दाङ घोराही ४ का ४९ बर्षीय भक्त बहादुर पुन, सोही स्थानमा ४१ बर्षीय केशब बहादुर पुन र शान्तिनगर गाउँपालिका १ का २९ बर्षीय रोबिन बुढा रहेको एसपी अधिकारीले बताए ।

पक्राउ परेका तीनै जना र बरामद गरिएका अङ्गहरुलाई जिल्ला बन कार्यालय पठाइने एसपी अधिकारीले पत्रकार सम्मेलनमा जानकारी दिएका छन् ।

पक्राउ परेकालाई बन्यजन्तु संरक्षण ऐन २०२९ अनुसार दश लाख रुपैयाँ जरिवाना तथा १५ बर्षसम्म कैद हुने एसपी अधिकारीले जानकारी दिएका छन् ।

एसपी अधिकारीले बाँके प्रहरीको कमान्ड सम्हालेको छोटो समयमै बन्यजन्तुका अङ्ग तस्करी गर्ने तीन वटा गिरोहलाई पक्राउ गरिसकेका छन् ।

प्रकाशित मिति: आइतबार, असार २७, २०७८ ११:२३