चैतभित्र सबैलाई खोप लगाउने लक्ष्य पूरा गर्न प्रधानमन्त्रीको निर्देशन

स्वास्थ्य

गृहपृष्ठ
स्वास्थ्य
चैतभित्र सबैलाई खोप लगाउने लक्ष्य पूरा गर्न प्रधानमन्त्रीको निर्देशन

चैतभित्र सबैलाई खोप लगाउने लक्ष्य पूरा गर्न प्रधानमन्त्रीको निर्देशन

बिहीबार, कात्तिक ११, २०७८ बागेश्वरी पोस्ट

नेपालगञ्ज । प्रधानमन्त्री शेरबहादुर देउवाले सबै नागरिकलाई कोभिड–१९ विरुद्धको खोप उपलब्ध गराउने सरकारी लक्ष्य पूरा गर्ने काममा कुनै कसर बाँकी नराख्न सम्बद्ध निकायलाई निर्देशन दिएका छन् ।

आज बसेको कोभिड–१९ सङ्कट व्यवस्थापन समन्वय केन्द्रको पहिलो बैठकमा प्रधानमन्त्री देउवाले दाताको सहयोगमार्फत् वा आफैँ खरिद गरेर भएपनि समयमै सबै नागरिकलाई निःशुल्क खोप उपलब्ध गराउन सम्बद्ध सबै निकायलाई निर्देशन दिएका छन् ।

बैठकमा स्वास्थ्य तथा जनसङ्ख्या मन्त्रालयले दिएको प्रस्तुतिकरण अनुसार अहिलेसम्म कुल जनसङ्ख्याको ३४ प्रतिशतले पहिलो र २२ प्रतिशतले दुवै मात्रा खोप लगाएका प्रधानमन्त्री तथा मन्त्रिपरिषद् कार्यालयका सचिव महेश्वर न्यौपानेले जानकारी दिए ।

असोज मसान्तसम्म एक तिहार्इ जनसङ्ख्यालाई खोप लगाउने सरकारी लक्ष्य अनुसार पहिलो मात्राका हिसाबले पूरा भएको छ । सरकारले यसै वर्षको चैत मसान्तसम्ममा सबै नागरिकलाई खोप लगाइसक्ने लक्ष्य लिएको छ ।

विगतमा कोभिड–१९ रोकथाम तथा नियन्त्रणका लागि जारी भएको अध्यादेश निष्क्रिय भइसकेपछि नेपाल सरकारले त्यसको व्यवस्थापनका लागि असोजमा आदेश जारी गरी सीसीएमसीलाई कोभिड–१९ सङ्कट व्यवस्थापन समन्वय केन्द्रमा रूपान्तरण गरेको थियो ।

बैठकमा यस केन्द्रबाट अहिलेसम्मको प्रगति विवरणको विषयमा र स्वास्थ्य मन्त्रालयबाट अहिलेको कोभिड–१९ सङ्क्रमणको राष्ट्रिय र अन्तर्राष्ट्रिय अवस्था तथा खोपका बारेमा प्रस्तुतिकरण भएको थियो । बैठकले यस समन्वय केन्द्रको जनशक्ति व्यवस्था र सङ्गठन संरचना स्वीकृत गर्ने निर्णय पनि गरेको सचिव न्यौपानेले जानकारी दिए ।

प्रकाशित मिति: बिहीबार, कात्तिक ११, २०७८ १६:५८

प्रतिक्रिया दिनुहोस्