नेपालमा कोरोनाको नयाँ भेरियन्ट ओमिक्रोन २ जनामा भेटियो

स्वास्थ्य

गृहपृष्ठ
स्वास्थ्य
नेपालमा कोरोनाको नयाँ भेरियन्ट ओमिक्रोन २ जनामा भेटियो

नेपालमा कोरोनाको नयाँ भेरियन्ट ओमिक्रोन २ जनामा भेटियो

सोमबार, मंसिर २०, २०७८ बागेश्वरी पोस्ट

नेपालगन्ज । नेपालमा कोरोना भाइरसको नयाँ भेरियन्ट ओमिक्रोन संक्रमण फेला परेको छ । नेपालमा ७१ वर्षीय र ६६ वर्षीय दुई जनामा कोरोना भाइरसको नयाँ भेरियन्ट ओमिक्रोनको संक्रमण पुष्टि भएको छ । स्वास्थ्य तथा जनसंख्या मन्त्रालयले सोमबार भर्चुअल पत्रकार सम्मेलन गर्दै यो जानकारी दिएको हो ।

ओमिक्रोन भेरियन्ट फेला परेको देशबाट मंसिर ३ गते नेपाल भित्रिएका ६६ वर्षीय पुरुष त्रिभुवन अन्तर्राष्ट्रिय विमानस्थलबाट नेपाल भित्रिँदा पीसीआर परीक्षणको रिपोर्ट नेगेटिभ देखिएको थियो ।

तर, मंसिर ७ गते उनको नजिकका ७१ वर्षीय व्यक्तिलाई कोरोना भाइरसको सङ्क्रमण जस्तै लक्षण देखिएपछि मंसिर ७ गते पीसीआर परीक्षण गरिएको थियो । सो क्रममा दुवै जनाको पीसीआर परीक्षण रिपोर्ट पोजेटिभ आएको थियो । तर, एस जीन नेगेटिभ अर्थात् डेल्टा भेरियन्ट देखिएको थिएन ।

त्यसपछि सो नमूनाको राष्ट्रिय जनस्वास्थ्य प्रयोगशालामा जीन सिक्वेन्सिङ गर्दा कोरोना भाइरसको नयाँ भेरियन्ट ओमिक्रोन पुष्टि भएको हो । अहिले दुवै जना आइसोलेसनमा रहेको मन्त्रालयले जनाएको छ । हाल उनीहरुमा कुनै लक्षणहरु नदेखिएको र स्वास्थ्यकर्मीको निगरानीमा रहेको मन्त्रालयले जनाएको छ । ती दुई व्यक्तिहरुसँग सम्पर्कमा आएका ६६ जनाको कन्ट्याक्ट ट्रेसिङ गर्दा सबैको नतिजा भने नेगेटिभ आएको र सबै स्वस्थ रहेको पाइएको मन्त्रालयले जनाएको छ ।

२४ नोभेम्बर २०२१ मा दक्षिण अफ्रिकामा कोरोनाको उत्परिवर्तित भाइरस ओमिक्रोन पहिलोपटक पहिचान भएको थियो । यो भेरियन्ट हालसम्म ३५ भन्दा बढी देशहरूमा फैलिइसकेको छ ।

प्रकाशित मिति: सोमबार, मंसिर २०, २०७८ १४:०८

प्रतिक्रिया दिनुहोस्