को हुन् पोषण केसी-किन दिए उम्मेदवारी ?

राजनीति

गृहपृष्ठ
राजनीति
को हुन् पोषण केसी-किन दिए उम्मेदवारी ?

को हुन् पोषण केसी-किन दिए उम्मेदवारी ?

बुधबार, मंसिर ८, २०७८ बागेश्वरी पोस्ट

नेपालगञ्ज । नेपाली कांग्रेस बाँकेका युवा नेता पोषण केसीले बाँके क्षेत्र नम्बर १ को संघीय निर्वाचन क्षेत्रको सभापति पदका लागि उम्मेदवारी दिएका छन् । उनको नेतृत्वमा प्यानलसहित उम्मेदवारी दर्ता गरिएको छ । क्षेत्र नम्बर १ का लगभग सबै अग्रज नेतादेखि युवा पुस्ताका नेता कार्यकर्ताहरुको साथ र समर्थनसहित केसीले उम्मेदवारी दर्ता गरेका हुन् । नयाँ नेतृत्व चुन्न विहिबार निर्वाचन हुँदैछ ।

नेपाल विद्यार्थी संघको राजनीतिबाट पाइला अघि सारेका केसी दुई दशकको सक्रिय पत्रकारितालाई विट मार्दै पूर्णकालीन राजनीतिक यात्रा सुभारम्भ गरेको छोटो समयमै नेपाली कांग्रेस क्षेत्र नम्बर १ मा सुदृढ र संगठिन कांग्रेस बनाउने अभियानसहित क्षेत्रीय सभापतिको उम्मेदवार बनेका छन् ।

पढ्नमा तेज, वाककला, नेतृत्व वहन गर्न सक्ने क्षमता पोषण केसीका बाल्यकालदेखिकै गुण हुन् । छरछिमेक–गाउँघरमा कसैलाई अप्ठ्यारो पर्दा अग्रसर भएर खटिने उनको बाल्यकालकै स्वभाव हो । बाँकेको तत्कालीन खासकुश्मा गाविस हाल राप्तीसोनारी गाउँपालिका १ लौकीमा २०३२ सालमा जन्मिएका केसीले यिनै बाल्यकालका गुणलाई आफ्नो उमेर बढ्दै जाँदा क्षमतामा प्रस्फुटन गर्दै गए । गाउँघरमै सरकारी विद्यालयबाट एसएलसी उत्तीर्ण गरेपछि उनको अध्ययन महेन्द्र बहुमुखी क्याम्पस नेपालगन्जबाट सुरु भयो । विकट ठाउँमा जन्मिएका केसीलाई विकटका नागरिकहरुले भोग्नु परेका दुःखकष्ट, समस्या लगायतका बारेमा राम्रोसँग जानकारी थियो । यी समस्या समाधानको विकल्प उनले पत्रकारिता र राजनीतिबाट मात्रै देखेका थिए ।

१४ वर्षकै कलिलो उमेरमा उनको मानसपटलमा यो छाप परिसकेको थियो । त्यसैले त उनी २०४६ सालको बहुदलीय व्यवस्था विरुद्ध अग्रसर हुन थाले । उनी विद्यार्थी आन्दोलनमा सहभागी हुँदै राजनीतिमा होम्मिए । बहुदल पुनःस्थापना लगत्तै विद्यार्थी राजनीतिलाई सक्रियतापूर्वक अगाडि बढाएका केसी २०५० सालमा नेविसंघ बाँके जिल्ला कमिटीको सदस्य बनेका थिए । अध्ययन, राजनीतिसँगै उनले पत्रकारितालाई पनि अगाडि बढाउने अवसर प्राप्त गरे ।

२०४८ सालमै उनी पत्रकारितामा होम्मिएका थिए । रेडियो नेपालको चर्चित कार्यक्रम घटना र विचारबाट पत्रकारिता प्रारम्भ गरेका केसी २०५२ सालमा नेपाल पत्रकार महासंघको केन्द्रीय पार्षद् भए । २०५८ सालमा उनी महासंघको केन्द्रीय सदस्य भए । २०६४ सालमा महासंघको महासचिव बनेर नेतृत्वदायी भूमिका निभाए ।

२०६८ सालमा भने उनी नेपाली काँग्रेसको केन्द्रीय प्रचार विभागको सदस्य बनेर कुशलतापूर्वक जिम्मेवारी निर्वाह गरे । २०६९ र २०७१ मा पत्रकार महासंघको अध्यक्षका प्रत्यासी केसीले २०७२ सालमा न्यूनतम पारिश्रमिक निर्धारण समितिको अध्यक्ष जस्तो गरिमामय जिम्मेवारी कुशलतापूर्वक निर्वाह गरे । एमए, एमफिल पूरा गरी पिएचडी गर्दै गरेका केसी राजनीतिक दलका नेताहरुसँग सिधै पहुँच राख्ने मध्येमा पर्छन् । पूर्व प्रधानमन्त्री तथा पूर्व पार्टी सभापति स्वर्गीय सुशील कोइरालासंग नजिक भएर उनले पार्टीमा महत्वपूर्ण जिम्मेवारी निर्वाह गरेका छन् ।

कार्यकर्ताको सुखदुःखमा अहोरात्र खटिने भएकाले केसीलाई सबैले रुचाउने गरेका छन् । पढेलेखेको, सबैलाई समेटेर लैजान सक्ने क्षमता भएको, केन्द्रीय राजनीतिमा सिधा पहुँच भएकाले पनि पार्टीलाई चलायमान गराउनेदेखि समग्र जिल्लाको विकासमा समेत प्रभाव पार्न सक्ने खुवी र क्षमता केसीमा रहेको कांग्रेसका नेता कार्यकर्ता बताउँछन् । पत्रकारिताका माध्यमबाट दुई दशक बढी समय देश र समाजको सेवा गरेका केसी अब राजनीतिका माध्यमबाट समाज बदल्ने संकल्पका साथ राजनीतिमा होमिएको बताउँछन् ।

समय सापेक्ष समाज निर्माण गर्दै समाजका आवश्यकता र चाहनालाई सम्बोधन गर्ने दृढ अठोटका साथ आफू राजनीतिमा लागेको उनी भन्छन् । समतामूलक समाज निर्माणको अभियानलाई राजनीतिक मोर्चाबाट सम्बोधन गर्न सकिने यथार्थ बोध गर्दै पूर्णकालीन राजनीतिक यात्रा थालेको उनको भनाई छ ।

कांग्रेसको संगठनलाई सदृढ बनाउँदै चलायमान र गतिशील बनाउन आफ्नो उम्मेदवारी रहेको केसी बताउँछन् । कांग्रेसलाइ अझ सबल र सक्षम बनाउन राजनीतिमा होमिएको केसीको भनाई छ । अग्रजलाई सम्मान गर्दै अनुजलाई प्रोत्साहन गर्ने उनले बताए । सबै अट्ने एकताबद्ध कांग्रेस बनाउने आफ्नो प्रयास रहने उनी बताउँछन् । क्षेत्रीय पार्टी कार्यालय बनाउने उनको अठोट छ ।

प्रकाशित मिति: बुधबार, मंसिर ८, २०७८ १९:२१