नेपालगञ्जमा आगलागी, एक जनाको मृत्यु

समाचार

गृहपृष्ठ
समाचार
नेपालगञ्जमा आगलागी, एक जनाको मृत्यु

नेपालगञ्जमा आगलागी, एक जनाको मृत्यु

आइतबार, कात्तिक १३, २०७९ बागेश्वरी पोस्ट

नेपालगञ्ज । बाँकेमा आगलागीमा परी एक जनाको मृत्यु भएको छ । अर्का एक जना घाइते भएका छन् । नेपालगञ्ज उपमहानगरपालिका वडा नम्बर ५ रामनगरस्थित रमेश कुमार नागको ३ कोठे पक्की घरमा रहेको काँचको चुराको गोदाममा आगलागी भएको प्रहरीले जनाएको छ ।

आगलागीमा परी घाइते भएका बर्दियाको मधुवन नगरपालिका वडा नम्बर ८ का २३ बर्षीय समिर वलीको मृत्यु भएको प्रहरीले जनाएको छ । उनको भेरी अस्पताल नेपालगञ्जमा उपचारका क्रममा मृत्यु भएको हो । यस्तै आगलागीमा परी घाइते भएका चुरा गोदामका साहु नेपालगञ्ज ५ का ३८ बर्षीय मो. आरिफ अन्सारीको भेरी अस्पतालमा उपचार भइरहेको छ । मृतक अन्सारीको साला नाता पर्ने र भेटघाटका लागि हिजो भिनाजुको गोदाममा आएको प्रहरीले जनाएको छ ।

जिल्ला आपतकालीन कार्य सञ्चालन केन्द्र बाँकेका सूचना व्यवस्थापन अधिकृत रुपन ज्ञवालीका अनुसार विहान ५.४० बजे सुरु भएको आगो विहान ६.३० बजे नियन्त्रणमा आएको थियो । नेपालगञ्ज उपमहानगरपालिकाको दुई वटा दमकल, प्रहरी र स्थानीयको सहयोगमा आगो नियन्त्रणमा आएको हो ।

आगलागीको खबर प्राप्त हुनासाथ जिल्ला प्रहरी कार्यालय बाँकेबाट प्रहरी प्रमुख प्रहरी उपरीक्षक श्यामकृष्ण अधिकारीको कमाण्डमा ६५ जना र सशस्त्र प्रहरी नम्बर ३० गणबाट सहायक प्रहरी निरीक्षक धनराज बुढाथोकीको कमाण्डमा १५ जनाको टोली घटनास्थलमा खटिएको थियो । आगलागीको कारण खुलेको छैन ।

प्रकाशित मिति: आइतबार, कात्तिक १३, २०७९ ०९:१४

प्रतिक्रिया दिनुहोस्