नवलपरासी पश्चिम सुस्तामा डुङ्गा दुर्घटना हुँदा तीन जनाको मृत्यु

समाचार

गृहपृष्ठ
समाचार
नवलपरासी पश्चिम सुस्तामा डुङ्गा दुर्घटना हुँदा तीन जनाको मृत्यु

नवलपरासी पश्चिम सुस्तामा डुङ्गा दुर्घटना हुँदा तीन जनाको मृत्यु

मंगलबार, कात्तिक १५, २०७९ बागेश्वरी पोस्ट

नेपालगञ्ज । नवलपरासी पश्चिम सुस्तामा डुङ्गा दुर्घटना हुँदा तीन जनाको मृत्यु भएको छ । दुई जना घाइते भएका छन् । नवलपरासीको सुस्ता गाउँपालिका –४ नर्सहीमा रहेको नारायणी नदीको भङ्गालोमा डुङ्गा दुर्घटना भएको हो ।

जिल्ला प्रहरी कार्यालय नवलपरासी पश्चिमका प्रहरी नायब उपरीक्षक भोजराज पाण्डेका अनुसार डुङ्गा दुर्घटनामा परी सुस्ता गाउँपालिका –४ गोकुल नगर बस्ने २२ वर्षीय गुड्ड हरिजन, १८ वर्षीय निरज हरिजन र १८ वर्षीय रञ्जित गुप्ताको मृत्यु भएको हो । दुर्घटनामा परी २२ वर्षका किशोर हरिजन र १५ वर्षीय सोहित सहानी घाइते भएका छन् । घाइतेहरूको शहिद स्मृति अस्पताल चौपत्तामा उपचार भइरहेको प्रहरी नायब उपरीक्षक पाण्डे बताए ।

सोमवार दिउँसो डुङ्गा दुर्घटना भएको हो । डुङ्गा पल्टिएर पाँच जना डुबेपछि उद्धार गरी चौपत्ता अस्पताल पुर्याइएकोमा तीन जनाको उपचारका क्रममा सोमवार राति मृत्यु भएको प्रहरी नायब उपरीक्षक पाण्डेले बताए ।

सुस्ता गोकुल नगरका युवाहरू नर्सही नजिक पटनहियामा पिकनिक खान गएका थिए । पिकनिक खाएर फर्किने क्रममा डुङ्गा दुर्घटनामा परेको हो । ७ जना पिकनिक खान गएकोमा दुई जना भने मर्चहवा गाउँतर्फको बाटो हुँदै घर फर्किएको पाण्डेले जानकारी दिए । पाँच जना भने नारायणीको भङ्गालो हुँदै डुङ्गामार्फत् फर्किँदा दुर्घटनामा परेका हुन् ।

प्रकाशित मिति: मंगलबार, कात्तिक १५, २०७९ ०८:२८

प्रतिक्रिया दिनुहोस्