गगनलाई किशोरको काउण्टर:म पनि प्रधानमन्त्रीको हकदार हुँ

राजनीति

गृहपृष्ठ
राजनीति
गगनलाई किशोरको काउण्टर:म पनि प्रधानमन्त्रीको हकदार हुँ

गगनलाई किशोरको काउण्टर:म पनि प्रधानमन्त्रीको हकदार हुँ

सोमबार, मंसिर १२, २०७९ बागेश्वरी पोस्ट

नेपालगन्ज । नेपाली काँग्रेसका सहमहामन्त्री तथा बाँके क्षेत्र नं. ३ बाट प्रतिनिधिसभामा नवनिर्वाचित सदस्य किशोरसिंह राठौरले आगामी सरकारको नेतृत्वको विषयमा पार्टीभित्र छलफल भएपछि मात्र टुंगो लाग्ने बताएका छन् ।

नेपाल प्रेस युनियन बाँके शाखाले आज आयोजना गरेको पत्रकार भेटघाटमा बोल्दै उनले युवा प्रधानमन्त्री बनाउने विषयमा पार्टीभित्र छलफल भएमा सबैभन्दा बढी हकदार आफू हुने बताए । युवालाई अगाडी बढाउने भए प्रधानमन्त्री बन्न आफु तयार रहेको उनको भनाई छ ।

उनले पार्टी महामन्त्रीद्वय गगन थापा र विश्वप्रकाश शर्मालाई सरकारको भन्दा पनि पार्टी बनाउन तिर लाग्नुपर्ने कुरामा जोड दिँदै भने–‘शर्मा र थापाले आगामी ५ वर्षमा पार्टीलाई एक्लै चुनाव लड्ने अवस्थामा पुर्याउनुपर्ने जिम्मेवारी भएकोले उहाँहरु सरकार भन्दा पनि पार्टी नेतृत्वमा बसेर पार्टी बनाउनतिर लाग्नुहुनेछ । यदि युवालाई जिम्मेवारी दिने हो भने म पनि अनुभवी युवा हुँ ।’

‘गगन र विश्वप्रकाश मात्र होइन, उहाँहरु भन्दा सिनियर म छु, म पनि युवा नै हो, म पनि तयार छु नि प्रधानमन्त्री चलाउनलाई,’ राठौरले भने ‘गगनजी स्ववियु सदस्य हुँदा म त्रिचन्द्र कलेजको स्ववियु सभापति थिएँ, म पनि तयार छु नि युवामा, गगनजी मात्र होइन, अरु साथीहरु प्रदिपजी पनि तयार हुनुहुन्छ ।’

उनले संबिधानको रक्षा र सत्ताको बागडोर सम्हाल्नको लागि बाम–लोकतान्त्रिक गठबन्धन गरिएको बताए । उनले बर्तमान गठबन्धनले नै सरकार निर्माण गर्नुपर्ने आफ्नो धारणा रहेको स्पष्ट बताए । सो कार्यक्रममा बाँके निर्वाचन क्षेत्र नं. ३ (२) बाट लुम्बिनी प्रदेशसभामा निर्वाचित बादशाह कुर्मीलाई समेत सम्मान तथा स्वागत गरिएको थियो ।

प्रकाशित मिति: सोमबार, मंसिर १२, २०७९ २०:३८