अपमानित महसुस गर्दै पोखरा आएँ: महामन्त्री थापा

राजनीति

गृहपृष्ठ
राजनीति
अपमानित महसुस गर्दै पोखरा आएँ: महामन्त्री थापा

अपमानित महसुस गर्दै पोखरा आएँ: महामन्त्री थापा

सोमबार, पुस ११, २०७९ बागेश्वरी पोस्ट

फाइल फोटो

नेपालगन्ज । नेपाली कांग्रेसका महामन्त्री गगनकुमार थापाले आफू अपमानित महसुस गरेर पोखरा आएको बताएका छन् ।

पार्टी सभापति शेरबहादुर देउवाले छलफलका लागि नबोलाएपछि अपमानित महसुस गरेर आफू पोखरातिर आएको महामन्त्री थापाले बताएका हुन् ।

पोखरामा आयोजित साहित्य सम्मेलनमा बोल्दै गठबन्धनको छलफल अघि पार्टीभित्र छलफल हुने आफूले अपेक्षा गरे पनि त्यसो नभएको थापाले बताए ।

सरकार निर्माणका विषयमा सभापति देउवाले पार्टीमा छलफल गर्ने र त्यो छलफलमा महामन्त्रीहरूलाई बोलाइने आफूले ठानेको उनको भनाइ थियो । 'सभापतिले पार्टीमा छलफल गर्छु र त्यसपछि गठबन्धनमा निर्णय गर्छु भन्नुहोला सोचेको थिएँ । पार्टीभित्र म पनि पर्छु भन्ने ठानेको थिएँ,’ उनले भने, ‘पार्टी अफिस भए म आफैं जान्थें । बालुवाटार निवास हो । निवासमा नबोलाइ जाने कुरा भएन ।’

बैठकमा बोलाइने भनेर आफूले टेलिफोन कुरेर बसेको थापाले बताए । उनले भने, ‘टेलिफोन कुरेर मैले १० बजेको प्लेनको टिकट १२ र १२ बजेको प्लेन टिकटलाई २ बजे सारेँ । फोन आएन । अनि अपमानित महसुस गरेर पोखरा आएँ ।’

थापाले आइतबारको घटनालाई एउटा प्रकरणको रूपमा बुझ्न कार्यकर्तालाई आग्रह गर्दै कांग्रेसलाई उठाउन एकजुट भएर लाग्न आग्रह गरेका छन् ।

प्रकाशित मिति: सोमबार, पुस ११, २०७९ १२:३९