फरक-फरक विचार बीच पनि मेलमिलाप आवश्यक–सहमहामन्त्री राठौर

राजनीति

गृहपृष्ठ
राजनीति
फरक-फरक विचार बीच पनि मेलमिलाप आवश्यक–सहमहामन्त्री राठौर

फरक-फरक विचार बीच पनि मेलमिलाप आवश्यक–सहमहामन्त्री राठौर

शनिबार, पुस १६, २०७९ बागेश्वरी पोस्ट

काठमाडौं । नेपाली काँग्रेसका सहमहामन्त्री किशोरसिंह राठौरले राष्ट्रिय हित र स्वार्थका लागि फरक-फरक विचार बीच पनि मेलमिलाप आवश्यक रहेको बताएका छन् ।

मेलमिलाप दिवसका अवसरमा आज शुभकामना सन्देश दिँदै सहमहामन्त्री राठौरले राष्ट्रियताको संरक्षण, लोकतन्त्रको प्रवद्र्धन एवं विकास र समुन्नतिका लागि राष्ट्रिय शक्ति बीच मेलमिलाप अहिले पनि उत्तिकै सान्दर्भिक रहेको उल्लेख गरेका छन् ।

वीपी कोइराला पञ्चायतको कठोर समयमा आफू विरुद्ध विभिन्न ८ बढी मुद्दा लगाएको राजाविरुद्ध मेलमिलापको नीति लिएर २०३३ पौष १६ मा निर्वासन त्यागेर स्वदेश फर्किएका थिए । निर्वाचनमा ठूलो दल भएपनि सरकारमा सहभागी हुन नसक्नु प्राविधिक विषय भएको भन्दै सहमहामन्त्री राठौरले ऐतिहासिक र ठूलो दलका रुपमा काँग्रेस राष्ट्र हितलाई केन्द्रविन्दुमा राखेर सरकारका राम्रा कामको समर्थन र हित प्रतिकूलका क्रियाकलापमा निरन्तर खबरदारी गरिरहने बताएका छन् ।

‘मेलमिलाप दिवसकै अवसरमा, नेपाली काँग्रेसको नेतृत्वमा हालै सम्पन्न प्रतिनिधिसभा र प्रदेशसभा निर्वाचनमा मतदान गरेर शान्तिपूर्ण रुपमा अभिमत प्रकट गर्नुभएकोमा सम्पूर्ण नेपाली दाजुभाई, दिदीबहिनीलाई आभारपूर्वक सम्झन चाहन्छु’ सहमहामन्त्री राठौरले सामाजिक सञ्जालमार्फत् सन्देशमा उल्लेख गरेका छन् ।

माओवादी सहितका ५ दलसंग गठवन्धन गरेर निर्वाचनमा गएको काँग्रेस निर्वाचनबाट ठूलो दल भएपनि माओवादीले एमाले सहितका ७ दलसंग मिलेर सरकार बनाएपछि प्रतिपक्षमा पुगेको छ ।

प्रकाशित मिति: शनिबार, पुस १६, २०७९ १३:५९