देशभरका सात वटै प्रदेशले पायो मुख्यमन्त्री

राजनीति

गृहपृष्ठ
राजनीति
देशभरका सात वटै प्रदेशले पायो मुख्यमन्त्री

देशभरका सात वटै प्रदेशले पायो मुख्यमन्त्री

बिहीबार, पुस २८, २०७९ बागेश्वरी पोस्ट

नेपालगन्ज । देशभरका सात वटै प्रदेशबाट मुख्यमन्त्री नियुक्त भएका छन् । मुख्यमन्त्रीहरुमा नेकपा एमालेका सबैभन्दा बढी रहेका छन् । एमालेबाट छ जना र जनता समाजबादी पार्टी (जसपा ) बाट एक जना मुख्यमन्त्री बनेका छन् । बुधबार मधेस, लुम्बिनी, कर्णाली र सुदूरपश्चिम प्रदेशमा मुख्यमन्त्री नियुक्त भएसंगै अब सबै प्रदेशमा सरकार गठन सुरु भएको छ ।

नेकपा एमालेबाट प्रदेश नं १ मा हिक्मतकुमार कार्की मुख्यमन्त्री भएका छन् । प्रदेश नं १ मा ६० जना सांसदको समर्थनमा कार्की गत आइतबार मुख्यमन्त्री नियुक्त भएका हुन् ।

९३ सदस्यीय प्रदेससभामा बहुमतका लागि ४७ मत आवश्यक भएकोमा एमालेका ४०, माओवादी केन्द्रका १३, राप्रपाका ६ र जसपाका एक गरी ६० जना सांसदले कार्कीलाई समर्थन गरेका छन् ।

त्यस्तै वाग्मती प्रदेशमा माओवादी संसदीय दलका नेता शालिकराम जम्मकट्टेल मुख्यमन्त्री भएका छन् । जम्मकट्टेल माओवादी केन्द्रका २१, एमाले २७, राप्रपा १३, नेकपा एस ७ हाम्रो नेपाली पार्टीका २ जना सांसदको समर्थनमा मुख्यमन्त्री बनेका हुन् ।

गण्डकी प्रदेशमा एमाले संसदीय दलका नेता खगराज अधिकारी मुख्यमन्त्री भएका छन् । उनलाई एमालेका २२, माओवादी केन्द्रका ८, राप्रपाका २ र एकजना स्वतन्त्रसहित ३३ सांसदको समर्थन छ । यो प्रदेशमा ६० सांसद छन् ।

जनता समाजवादी पार्टीका संसदीय दलका नेता सरोजकुमार यादव मधेस प्रदेशको मुख्यमन्त्री नियुक्त भएका छन् ।

यादवलाई यादवलाई एमालेका २३, जसपाका १६, जनमतका १३, माओवादीका ८ र ३ जना स्वतन्त्र सांसदको समर्थन छ । यहाँ जम्मा १०७ जना सांसद छन् ।

त्यस्तै लुम्बिनी प्रदेशमा नेकपा एमालेका संसदीय दलका नेता लिला गिरी मुख्यमन्त्री भएका छन् । उनलाई एमालेका २९, माओवादी केन्द्रका १०, राष्ट्रिय प्रजातन्त्र पार्टीका ४, नागरिक उन्मुक्ति पार्टीका ४, जनता समाजवादी पार्टीका ३, जनमत पार्टीका ३ जना, लोकतान्त्रिक समाजवादी पार्टीका ३ जना र २ जना स्वतन्त्र सांसदहरूले समर्थन दिएका छन् । लुम्बिनी प्रदेशमा ८७ जना सांसद छन् ।

त्यस्तै सुदूरपश्चिम प्रदेशमा नेकपा एमालेका राजेन्द्र रावल मुख्यमन्त्री भएका छन् । रावल समानुपातिक प्रणालीबाट सांसद भएका हुन् । ५३ जना सांसद भएको यो प्रदेशमा रावललाई एमाले १०, माओवादी केन्द्र ११, नागरिक उन्मुक्ति ७ र राप्रपा १ जना गरी २९ सांसदले समर्थन दिएका छन् ।

त्यस्तै कर्णाली प्रदेशमा माओवादी केन्द्रका राजकुमार शर्मा मुख्यमन्त्री भएका छन् । उनलाई माओवादी केन्द्रका १३, एमालेका १०, राप्रपाका १, एकीकृत समाजवादी १ सांसदले समर्थन गरेका छन् । उनी रूकुम पश्चिमबाट प्रदेशसभामा चुनिएका हुन् । यहाँ सत्ता साझेदार माओवादी र एमालेबीच आधा-आधा कार्यकाल सरकारको नेतृत्व गर्ने सहमति भएको छ । सबै प्रदेशमा मुख्यमन्त्री नियुक्त भएसँगै मन्त्रमण्डल विस्तारको तयारी हुँदैछ ।