घटनास्थलमा पुग्दा जहाज जलिरहेको थियो...

समाचार

गृहपृष्ठ
समाचार
घटनास्थलमा पुग्दा जहाज जलिरहेको थियो...

घटनास्थलमा पुग्दा जहाज जलिरहेको थियो...

आइतबार, माघ १, २०७९ बागेश्वरी पोस्ट

हामी घटनास्थलमा पुग्दा जहाज जलिरहेको थियो । त्यहाँ स्थानीयको भीड लागिसकेको थियो । माघे संक्रान्ति भएका कारण नजिकै मेला पनि लागिरहेको थियो । त्यसैले पनि मान्छेहरू धेरै जम्मा भइसकेका थिए ।

हामी पुग्दा २ जना यात्रु सास चलिरहेको अवस्थामा निकालिएका थिए । उहाँहरूलाई एम्बुलेन्समा हालियो । मैले घटनास्थलका केही फोटोहरू खिँचे । अनि उद्धारमा पनि लागें । के गर्ने कसो गर्ने केही भेउ पाइरहेका थिएनौं । हामी साथीहरु मिलेर पुगेका थियौं ।

खासमा उद्धार टोली आधा घण्टा जति ढिला भएको थियो । त्यो बेलासम्म जहाज जलिसकेको थियो र त्यहाँबाट निकाल्न नसकिएकाहरू पनि जलिसकेका थिए होलान् ।

जहाज जहाँ खसेको हो त्यहाँ वरिपरि बाक्लो वस्ती छ । बीचको खोंचमा जहाज खसेको भएर वस्ती जोगिएको जस्तो लाग्छ ।खासमा त्यहाँको घर नजिकै रहेको बाँसघारी पनि जहाजमा लतारिएको छ । त्यसैले घटनास्थलमा धेरै घना वस्ती भएको ठाउँ हो भन्ने स्पष्ट हुन्छ । खोंचमा जहाज ठोक्कियो । घरहरूमा ठोक्किएको भए सायद अझ धेरै मानवीय क्षती हुन सक्थ्यो ।

खासमा पोखरा विमानस्थलमा अवतरण हुनका लागि केही समय मात्रै बाँकी थियो । अन्तर्राष्ट्रिय विमानस्थलकै रुट थियो । त्यहाँ अवतरणको तयारी गरिरहेका बेला जहाज खसेको रहेछ । सुदर्शन रन्जित (प्रत्यक्षदर्शी)

प्रकाशित मिति: आइतबार, माघ १, २०७९ १५:३४

प्रतिक्रिया दिनुहोस्