सभामुखको आज मनोनयन दर्ता

राजनीति

गृहपृष्ठ
राजनीति
सभामुखको आज मनोनयन दर्ता

सभामुखको आज मनोनयन दर्ता

बुधबार, माघ ४, २०७९ बागेश्वरी पोस्ट

नेपालगन्ज । आज सभामुख पदमा मनोनयन दर्ता हुँदैछ । सङ्घीय संसद् सचिवालयद्वारा आज प्रकाशित निर्वाचन तालिका अनुसार दिउँसो १ बजेदेखि ४ बजेसम्म सङ्घीय संसद् भवन नयाँ बानेश्वरमा प्रतिनिधिसभाका कुनै सदस्यलाई सभामुखमा निर्वाचित गरियोस् भनी प्रस्तावको सूचना दर्ता गरिनेछ ।

निर्धारित समयभित्र दर्ता भएका उम्मेदवारीको सूचनाको दर्ता अनुसारको सूची आज ४.१५ बजे प्रकाशित गरिनेछ । प्रतिनिधिसभाको माघ ५ गते ११ बजेको बैठकमा सभामुख पदमा निर्वाचित गरियोस् भनी प्रस्तावकले प्रस्ताव र समर्थकले समर्थन गर्ने कार्यतालिका छ । त्यस लगत्तै उम्मेदवारीको सूचनामाथिको सामूहिक रूपमा छलफल हुने र दर्ता क्रमानुसार निर्माणार्थ प्रस्तुत गरिनेछ ।

प्राप्त प्रस्तावलाई प्रस्तावकले बैठकमा पेस गरेपछि समर्थन गर्ने दलका तर्फबाट सदस्यहरूले समर्थन गर्नेछन् । सबै प्रस्तावमा सोही प्रक्रिया चल्नेछ । छलफल सकिएपछि निर्वाचनको प्रक्रिया अपनाइनेछ । एक मात्र प्रस्ताव परेको अवस्थामा भने सभामुख चयन निर्विरोध हुनेछ ।

मतदानमा जानु परे सभामा तत्काल कायम रहेका सदस्य सङ्ख्याको बहुमतबाट निर्वाचित गरिनेछ । कुल २७५ सदस्यीय प्रतिनिधिसभामा निर्वाचित हुन कम्तीमा १३८ सदस्यको आवश्यकता पर्नेछ । सभामुखमा सत्तारूढ गठबन्धनबाट नेकपा (एमाले) ले उम्मेदवार बनाउने निश्चित छ । एमालेले देवराज घिमिरेलाई अघि सार्दैछ । नेपाली कांग्रेस लगायतका अन्य दलबाट सभामुखको उम्मेदवार टुङ्गो लागि सकेको छैन ।

एमालेभित्र सभामुखमा पृथ्वीसुब्बा गुरुङ, छविलाल विश्वकर्मा तथा विद्या भट्टराईको नाम चर्चामा थियो । तर, उपमहासचिव पृथ्वी सुब्बा गुरुङलाई रोक्न महासचिव शङ्कर पोखरेलले झापाका पुराना नेता देवराज घिमिरेलाई अघि सारेका छन् ।

प्रकाशित मिति: बुधबार, माघ ४, २०७९ ०८:३१

प्रतिक्रिया दिनुहोस्