जहाज दुर्घटना अपडेट: २२ वटा शव आफन्तलाई बुझाइयो

समाचार

गृहपृष्ठ
समाचार
जहाज दुर्घटना अपडेट: २२ वटा शव आफन्तलाई बुझाइयो

जहाज दुर्घटना अपडेट: २२ वटा शव आफन्तलाई बुझाइयो

बुधबार, माघ ४, २०७९ बागेश्वरी पोस्ट

नेपालगन्ज । पोखरामा भएको यति एयरलाइन्सको ९ एन एएनसी एटीआर ७२–५०० जहाज दुर्घटनामा परेकामध्ये २२ जनाको शव उनीहरुका परिवारजनलाई बुझाइएको छ ।

पोखरामा परीक्षण गरिएका सबै शव आफन्तले बुझेका कास्कीका सहायक प्रमुख जिल्ला अधिकारी अनिलकुमार शाहीले जानकारी दिए । उनका अनुसार हिजो भेटिएको शव पनि परीक्षणका लागि काठमाडौँ पठाउने तयारी भइरहेको छ । दुर्घटनामा परेका एक जनाको स्थिति अझै अज्ञात छ । यसअघि हिजो नै ४८ शवलाई काठमाडौँस्थित शिक्षण अस्पताल पुर्‍याइएको थियो ।

पहिचान र सनाखत हुन नसकेका, विदेशी नागरिक र चालक दलका सदस्यको शव काठमाडौँमा परीक्षण हुनेछ । शव क्षतविक्षत भएका कारण पहिचानका लागि डिएनए परीक्षण गर्नुपर्ने भएकाले आफन्तले शव पाउन अझै केही दिन लाग्ने देखिएको छ ।

जिल्ला प्रहरी कार्यालय कास्कीका प्रमुख प्रहरी उपरीक्षक अजय केसीले दुर्घटनामा बेपत्ता एक व्यक्तिको खोजी कार्य भइरहेको बताए । हिजो पनि दिनभर गोताखोर र ड्रोन प्रयोग गरेर शवको खोजी गरिएको थियो । सेती नदीको पानीको सतह घटाएर खोजी गर्दा दुर्घटनास्थल भन्दा दुई किलोमिटर तल एउटा शव फेला परेको हो ।

“सोमबार शव खोज्दा हात, करङ र टाउकाको भाग छुट्टाछुट्टै भेटिएको थियो, त्यो दुई व्यक्तिको हो वा एउटैको हो, पत्ता लगाउने काम भइरहेको छ”, उनले भने । ६८ यात्रसहित चार चालक दलका सदस्य लिएर आइतबार काठमाडौँबाट पोखराका लागि उडेको जहाज सेतीखोँचमा खसेर दुर्घटना भएको थियो ।

प्रकाशित मिति: बुधबार, माघ ४, २०७९ ०९:५९

प्रतिक्रिया दिनुहोस्