राष्ट्रपतिको चुनाव नसार्न आयोग र सरकारलाई कांग्रेसको आग्रह

राजनीति

गृहपृष्ठ
राजनीति
राष्ट्रपतिको चुनाव नसार्न आयोग र सरकारलाई कांग्रेसको आग्रह

राष्ट्रपतिको चुनाव नसार्न आयोग र सरकारलाई कांग्रेसको आग्रह

सोमबार, माघ ९, २०७९ बागेश्वरी पोस्ट

नेपालगन्ज । नेपाली कांग्रेसले राष्ट्रपतिको निर्वाचन तोकिएको समयमै गर्न सरकार र निर्वाचन आयोगसँग आग्रह गरेको छ । सभापति शेरबहादुर देउवा निवास धुम्बाराहीमा पार्टी पदाधिकारी र पूर्व पदाधिकारीको आज भएको बैठकले सो निर्णय गरेको प्रवक्ता डा. प्रकाशशरण महतले जानकारी दिए ।

बैठकले कुनै पनि कानुनी अड्चन देखाएर राष्ट्रपतिको निर्वाचन पछि सार्न नहुनेबारे सरकार र निर्वाचन आयोगको ध्यानाकर्षण गराएको हो । बैठकमा राष्ट्रपतिको निर्वाचन समयमै गर्नुपर्ने र कुनै कानुनी समस्या भए त्यसलाई समाधान गरी निर्वाचन प्रक्रियालाई अघि बढाउनुपर्ने सम्बन्धमा छलफल भएको उनले बताए ।

नेपालको संविधानको धारा ६३ मा राष्ट्रपतिको कार्यकाल पाँच वर्ष हुने उल्लेख छ । राष्ट्रपति विद्यादेवी भण्डारी २०७४ साल फागुन २९ गते दोस्रो कार्यकालका लागि सो पदमा निर्वाचित भएकी हुन् । यसैगरी राष्ट्रपति तथा उपराष्ट्रपतिको निर्वाचनसम्बन्धी ऐन, २०७४ को दफा ४ मा आयोगले राष्ट्रपतिको पदावधि सकिनु भन्दा कम्तीमा एक महिना अघि निर्वाचनको मिति तोकी सोको जानकारी नेपाल सरकारलाई दिनुपर्ने उल्लेख छ ।

कांग्रेसले राष्ट्रपतिको निर्वाचनका सम्बन्धमा अरू दलको पनि सहयोग लिएर प्रस्तुत हुने दृष्टिकोण राखेको प्रवक्ता महतले बताए । यसका लागि कांग्रेसले संसद्मा रहेका अन्य दलसँग पनि सरसल्लाह गर्ने जनाएको छ ।

प्रकाशित मिति: सोमबार, माघ ९, २०७९ १५:५६