विज्ञप्तिको ‘प्रोक्सी वार’ पछि गृहमन्त्री र आइजीपीको सम्बन्ध असन्तुलित बन्दै

राजनीति

गृहपृष्ठ
राजनीति
विज्ञप्तिको ‘प्रोक्सी वार’ पछि गृहमन्त्री र आइजीपीको सम्बन्ध असन्तुलित बन्दै

विज्ञप्तिको ‘प्रोक्सी वार’ पछि गृहमन्त्री र आइजीपीको सम्बन्ध असन्तुलित बन्दै

बुधबार, माघ ११, २०७९ बागेश्वरी पोस्ट

नेपालगन्ज । उपप्रधान तथा गृहमन्त्री रवि लामिछाने र नेपाल प्रहरीका आइजीपी धिरजप्रताप सिंहबीच सम्बन्ध असन्तुलित भएको छ । डीआइजीहरुको सरुवापछि नै असन्तुलित बनेको सम्बन्धमा लक्ष्मी महतो कोइरीको पक्राउ र एसपीहरूको सरुवा विषयले झन् बिग्रँदै गएको छ । ३० वर्षे सेवा अवधि पूरा हुन तीन महिना बाँकी हुँदा गृहमन्त्री र आइजीपीको सम्बन्ध असन्तुलित भएकाले नेपाल प्रहरीको भावी नेतृत्वमा समेत असर पर्ने देखिएको छ ।

आपराधिक पृष्ठभूमि रहेका सांसद कोइरी एमालेको तर्फबाट संसद्मा प्रतिनिधित्व गर्छन् । उनलाई पक्राउ गर्न संसद्मा प्रमुख प्रतिपक्षी दलका सांसदहरूले निरन्तर आवाज उठाएपछि गृहमन्त्री लामिछानेले मौखिक आदेश प्रहरीले पालना नगरेको भन्दै गृहमन्त्रालयबाट विज्ञप्ति नै जारी गरे । गृहमन्त्रीको सो विज्ञप्तिपछि नेपाल प्रहरी र गृहमन्त्रलयबीच ‘प्रोक्सी वार’ चल्यो । त्यसपछि प्रहरीले पनि ७७ वटै जिल्ला प्रहरी कार्यालयलाई पत्राचार गरिएको भन्दै अर्को सूचना प्रवाह गरिदियो । जबकि उपत्यका अपराध अनुसन्धान कार्यालयले सांसद कोइरीको पक्राउका लागि संसद् सचिवालयमा पक्राउ आदेश मागिसकेको थियो । त्यसलाई बेवास्ता गदै मन्त्रालयले विज्ञप्ति जारी गरेको पनि एक हप्ता बित्न लाग्यो ।

गृह मन्त्रालयले यस्तो ब्यहोराको विज्ञप्ति सार्वजनिक गरेपछि गृहमन्त्री लामिछानेमाथिको आलोचना शुरु भयो । आलोचकहरूले उनको दक्षता र कार्यक्षमतामाथि नै प्रश्न चिह्न उठाए । गृह मन्त्रालय मातहतको सुरक्षा निकायले गृहमन्त्रीको ‘पटक-पटकको मौखिक निर्देशन कार्यान्वयन नगरेको’ भन्ने ब्यहोराको विज्ञप्ति आउनै नहुने बताइरहेका बेला प्रहरीले ७७ जिल्ला प्रहरीलाई निर्देशन दिएको भनेर गृह मन्त्रलयलाई सूचना प्रवाहमै काउण्टर दियो । ‘ल एन्ड अर्डर’ को मान्यता अनुसार गृह मन्त्रालय वा गृहमन्त्रीको लिखित र मौखिक वा जस्तोसुकै माध्यमबाट भएको निर्देशन प्रहरीले मान्नुपर्छ । मानिएन भने कारबाही गर्ने अधिकार गृहमन्त्रीलाई हुन्छ तर त्यस्तो विषयलाई गृहमन्त्रीले बाहिर ल्याएर कोइरीलाई पक्राउ गर्न भन्दा तालुक मन्त्रालय र मातहतको निकायबीच खटपट भएको सङ्केत गरिदिए । गृह मन्त्रालयका प्रवक्ता फणिन्द्रमणि पोखरेलले मन्त्रालय र प्रहरी संगठनबीच कुनै पनि खटपट उत्पन्न नभएको बताउँछन् । सांसद कोइरीका सम्बन्धमा व्यापक जनचासो बढेकाले नेपाल प्रहरीलाई निर्देशन कार्यान्वयन गर्न थप जिम्मेवारी बनाउने उद्देश्यले मात्रै विज्ञप्ति जारी भएको उनको दाबी छ ।

‘गृह मन्त्रालय गम्भीर छ। प्रहरीलाई जिम्मेवार बनाउन थप लिखित निर्देशन गरेको छ भन्ने विषय जनाउन मात्रै विज्ञप्ति जारी गरिएको हो,’ उनले भने । पुस ७ गते कोइरीले अरू सांसदसँगै शपथ पनि लिए । काठमाडौं उपत्यका अपराध अनुसन्धान कार्यालयको टोली खटिए पनि उनलाई पक्राउ गर्न सकेको थिएन । यस्तै पुस २६ गते प्रधानमन्त्री पुष्पकमल दाहालले प्रतिनिधिसभामा विश्वासको मत लिँदा पनि कोइरी उपस्थित भएर पक्षमा मतदान गरेका थिए । सभामुखको निर्वाचन हुँदा पनि प्रतिनिधिसभा बैठकमा उनी उपस्थित भएका थिए । तर, त्यसदिन उनी मतदान नगरी निस्किएका थिए ।

गृह मन्त्रालयले सुरक्षा, अपराध निवारण र फरार अभियुक्त पक्राउ सन्दर्भमा प्रहरीलाई निर्देशन दिँदा सार्वजनिक विज्ञप्तिमार्फत गर्न नमिल्ने र गृहमन्त्री वा गृह मन्त्रालयले यस्ता विषय प्रहरी प्रमुख वा तालुकदार अधिकारीलाई बोलाएर मौखिक वा लिखित रूपमै निर्देशन दिने भएकाले यस्तो विषय बाहिर आउँदा प्रहरीले झन् काम नगरेको स्पष्ट देखिएको छ । एक हप्ता बितिसक्दा पनि अहिलेसम्म कोइरी पक्राउ परेका छैनन् ।

प्रहरी प्रधान कार्यालयले गृहमन्त्रीको निर्देशन नमान्ने भन्ने सवाल नै नहुने भन्दै नेपाल प्रहरीका प्रवक्ता पोषराज पोखरेलले यसअघि नै ७७ वटै जिल्ला प्रहरी कार्यालयलाई निर्देशन गइसकेको बताउँछन् । ‘हरेक परिवर्तनपछि जनताबाट अनुमोदन भएको शक्तिको पछाडि प्रहरी उभिएको छ। अहिले गृहमन्त्रीज्यूको निर्देशन नमान्ने भन्ने नै हुन्न,’ डिआइजी एवं प्रवक्ता पोखरेलले भने ।

अहिले कोइरी भारत भागेको अनुमान गरिएको छ । प्रहरीले यो विषयमा सूक्ष्म अनुसन्धान गरेको जनाएपनि संसद् सचिवालयले पक्राउ आदेश नदिँदासम्म वा संसद् अधिवेशन बन्द नहुँदासम्म उनी पक्राउ पर्ने अवस्था नभएको प्रहरी अधिकारीहरूको दाबी छ । हाम्राकुराडटकमबाट साभार

प्रकाशित मिति: बुधबार, माघ ११, २०७९ १३:२१

प्रतिक्रिया दिनुहोस्