माओवादी केन्द्रले राष्ट्रपतिमा राष्ट्रिय सहमतिका लागि पहल गर्ने

राजनीति

गृहपृष्ठ
राजनीति
माओवादी केन्द्रले राष्ट्रपतिमा राष्ट्रिय सहमतिका लागि पहल गर्ने

माओवादी केन्द्रले राष्ट्रपतिमा राष्ट्रिय सहमतिका लागि पहल गर्ने

शुक्रबार, माघ १३, २०७९ बागेश्वरी पोस्ट

नेपालगन्ज । नेकपा माओवादी केन्द्रले राष्ट्रपति राष्ट्रिय सहमतिमा बनाउनका लागि पहल गर्ने भएको छ।

माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डलाई राष्ट्रिय सहमतिमा राष्ट्रपति बनाउन स्थायी समितिमा रहेका नेताहरूले सुझाव दिएका छन् ।

पार्टी मुख्यालय पेरिसडाँडामा आज बसेको स्थायी समिति बैठकले प्रचण्डलाई कांग्रेस र एमालेसहित सबैको सहमति गरेर राष्ट्रपति बनाउन सुझाव दिएको हो ।

प्रधानमन्त्री प्रचण्डले स्थायी कमिटीका सदस्यहरूसँग राष्ट्रपतिको विषयमा सुझाव माग गरेका थिए । सत्ता गठबन्धन दल एमाले र सत्ताबाहिर रहेको कांग्रेसले राष्ट्रपतिमा दावी गरिरहेका छन् । कांग्रेसले प्रधानमन्त्रीमा प्रचण्डलाई विश्वासको मत दिएसँगै प्रचण्ड कांग्रेस तिर नजिकिएका छन् ।

वर्तमान सत्ता गठबन्धन एमालेकै जगमा बनेका कारण एमालेबाट बाहिर जान कठिन रहेको तर राष्ट्रिय सहमति बन्ने अवस्थामा कांग्रेस लगायतका दलहरूको पनि सहभागी हुने भएपछि माओवादी अध्यक्ष प्रचण्डले बैठकको सुरुवातमै राजनीतिक प्रतिवेदन पेश गर्दा राष्ट्रपतिबारे पनि सुझाव दिन आग्रह गरेका थिए ।

पार्टीको बैठकमा अधिकांश पदाधिकारीहरूले एमालेप्रति अझै शङ्काको दृष्टिले हेर्नुपर्ने धारणा राखेका थिए । उनीहरूले राष्ट्रपतिको निर्वाचनमा झन् बढी नै शङ्का गर्नुपर्ने भएकाले एमालेकै पात्र भएपनि वाम आन्दोलन र वामगठबन्धप्रति सहज हुने व्यक्ति छान्न सुझाव दिएका थिए ।

आजको बैठकमा अध्यक्ष दाहालले प्रतिनिधिसभा र प्रदेशसभा सदस्य निर्वाचन, निर्वाचनपछिको समग्र पार्टीको अवस्था, सरकार निर्माणका क्रममा गठन भएको गठबन्धन, सरकारको गतिविधिबारे ब्रिफिङ गरेका थिए ।

प्रकाशित मिति: शुक्रबार, माघ १३, २०७९ १७:४१