लुम्बिनीमा मन्त्रिपरिषद् विस्तार, राजीनामा दिएकी कृष्णा आन्तरिक मामिला मन्त्री

राजनीति

गृहपृष्ठ
राजनीति
लुम्बिनीमा मन्त्रिपरिषद् विस्तार, राजीनामा दिएकी कृष्णा आन्तरिक मामिला मन्त्री

लुम्बिनीमा मन्त्रिपरिषद् विस्तार, राजीनामा दिएकी कृष्णा आन्तरिक मामिला मन्त्री

शनिबार, माघ २८, २०७९ बागेश्वरी पोस्ट

नेपालगन्ज । लुम्बिनी प्रदेशमा मन्त्रिमण्डल विस्तार भएको छ । मुख्यमन्त्री नियुक्त भएको १ महिनापछि लुम्बिनी प्रदेशमा मन्त्रीपरिषद्ले पूर्णता पाएको हो । गत पुस २७ गते मुख्यमन्त्रीको रूपमा नियुक्त भएका नेकपा एमालेका लिला गिरीले आज मन्त्रिमण्डल विस्तार गरेका हुन् ।

नेपालको संविधानको धारा १६८ को उपधारा ९ बमोजिम गिरीले मन्त्रिपरिषद् विस्तार गरेका हुन् । प्रदेश प्रमुखको कार्यालय लुम्बिनीका प्रवक्ता ऋषिराम पन्थीद्वारा हस्ताक्षर विज्ञप्तिमा गिरीसहित १० सदस्यीय मन्त्रिमण्डल विस्तार गरिएको छ ।

मन्त्रिमण्डल विस्तार गरिनेमा आज दिउँसो राजीनामा दिएकी बिना विभागीय मन्त्री कृष्णा केसीलाई मन्त्रालयको जिम्मा लगाइएको छ । माआवोदी केन्द्रकी कृष्णालाई आन्तरिक मामिला, कानून तथा सहकारी मन्त्री बनाइएको हो ।

त्यस्तै माओवादी केन्द्रका जोखबहादुर महरा आर्थिक मामिला मन्त्री, एमालेका चेतनारायण आचार्य खानेपानी, ग्रामीण तथा शहरी विकास मन्त्री, माओवादी केन्द्रका इन्द्रजीत थारु भौतिक पूर्वाधार विकास मन्त्री, एमालेका विष्णुप्रसाद पन्थी स्वास्थ्य मन्त्री नियुक्त भएका छन् ।

एमालेका दुर्गाप्रसाद चौधरी वन तथा वातावरण मन्त्री, राप्रपाकी जानकीप्रसाद यादव उद्योग, पर्यटन तथा यातायात व्यवस्था मन्त्री, एमालेका तुलसीराम शर्मा कृषि तथा भूमि व्यवस्था मन्त्री, जनमतका चन्द्रकेश गुप्ता सामाजिक विकास मन्त्री नियुक्त भएका हुन् ।

८७ सदस्यीय प्रदेशसभामा ५८ सांसदको सरकारलाई समर्थन छ । एमाले, माओवादी केन्द्र, जनता समाजवादी पार्टी, राप्रपा, लोकतान्त्रिक समाजवादी पार्टी, नागरिक उन्मुक्ति पार्टी, जनमत पार्टीसहित दुई स्वतन्त्र सांसदले सरकारलाई समर्थन गरेका छन् । योसँगै लामो समयदेखि रचेको लुम्बिनीको किचलो समाप्त हुने विश्वास गरिएको छ ।