कांग्रेसलाई राष्ट्रपति दिन आठ दल सहमत

राजनीति

गृहपृष्ठ
राजनीति
कांग्रेसलाई राष्ट्रपति दिन आठ दल सहमत

कांग्रेसलाई राष्ट्रपति दिन आठ दल सहमत

शुक्रबार, फागुन १२, २०७९ बागेश्वरी पोस्ट

नेपालगञ्ज । कांग्रेस, माओवादी, एकीकृत समाजवादीसहित ८ दलको बैठकले राष्ट्रपतिमा कांग्रेसलाई अघि बढाउने निर्णय गरेको छ । बैठक सकिएपछि बालुवाटारबाट बाहिरिँदै नेकपा एकीकृत समाजवादीका नेता प्रकाश ज्वालाले कांग्रेसलाई राष्ट्रपति दिने निर्णय भएको जानकारी गराएका छन् ।

बैठकमा कांग्रेस, माओवादी, एकीकृत समाजवादी, जनता समाजवादी पार्टी, लोकतान्त्रिक समाजवादी पार्टी, जनमत पार्टी, राष्ट्रिय जनमोर्चा र नागरिक उन्मुक्ति पार्टीबीच छलफल चलेको थियो । सुरुमा कांग्रेस, माओवादी. एकीकृत समाजवादी र जसपामात्र बैठकमा बसे पनि रात छिप्पिँदै जाँदा लोसपा, नागरिक उन्मुक्ति, जनमत र जनमोर्चा पनि बैठकमा थपिएका थिए ।

एमाले, राष्ट्रिय स्वतन्त्र पार्टी र राष्ट्रिय प्रजातन्त्र पार्टी भने बैठकमा सहभागी थिएनन् । बैठकले कांग्रेस नेतृत्वको गठबन्धन औपचारिक रुपमा पुन: सतहमा ल्याएको छ। यसअघि एमाले अध्यक्ष केपी ओली प्रधानमन्त्री पुष्पकमल दाहालसँग बालुवाटारमा भेटघाट गरेर फर्किए पनि प्रधानमन्त्री दाहालबाट कुनै सकारात्मक सन्देश पाउन सकेनन् ।

ओलीले गत पुस १० गतेको सहमति अनुसार नै अघि बढ्न प्रधानमन्त्री प्रचण्डलाई आग्रह गरेका थिए । पुस १० मा प्रचण्ड प्रधानमन्त्री नियुक्त हुनुअघि राष्ट्रपति एमालेलाई दिने सहमति भएको एमाले नेताहरूको दाबी छ । प्रधानमन्त्री प्रचण्डले भने राष्ट्रपति निर्वाचनमा राष्ट्रिय सहमति खोज्नुपर्ने अडान राखेका थिए । राष्ट्रपति उम्मेदवारको मनोनयनका लागि शनिबार तिथि निर्धारित गरिएको छ।

प्रकाशित मिति: शुक्रबार, फागुन १२, २०७९ १९:४४