विकासमा राजनीति गर्नु हुँदैन: मन्त्री नमुना

समाचार

गृहपृष्ठ
समाचार
विकासमा राजनीति गर्नु हुँदैन: मन्त्री नमुना

विकासमा राजनीति गर्नु हुँदैन: मन्त्री नमुना

सोमबार, फागुन १५, २०७९ बागेश्वरी पोस्ट

नेपालगन्ज । लुम्बिनी प्रदेश सरकारकी आन्तरिक मामिला, कानुन तथा सहकारी मन्त्री कृष्णा केसी (नमुना) ले विकासमा कसैले राजनीति गर्न नहुने बताएकी छिन् ।

खजुराको सैनिकमा आ ४१औं मगर संघ स्थापना दिवस तथा मगर एकता दिवसको अवसरमा आयोजित कार्यक्रममा बोल्दै उनले सो कुरा बताएकी हुन् । मन्त्री केसीले विकासमा राजनीति नभएर सबैले सहकार्य गरेर अगाडि बढ्नुपर्नेमा जोड दिइन् ।

‘विकासमा राजनीति होइन, सबैको सहकार्य अहिलेको आवश्यकता हो’ उनले भनिन्, ‘म पनि जुनसुकै राजनीतिक दलमा रहे पनि विकासमा राजनीति गर्दैन । विकासका काममा सबैसँग समन्वय र सहकार्य गर्छु ।’ जिल्लाकै अर्को स्थानबाट निर्वाचन जिते पनि खजुरा क्षेत्रको विकासमा आफूले पहल गर्ने मन्त्री केसीले प्रतिवद्धता जनाइन् ।

‘खजुरा क्षेत्र मेरो राजनीतिको आधारभूमी समेत हो । मैले खजुराबाट नै राजनीति सुरु गरेकी हुँ,’ उनले भनिन्, ‘खजुरा क्षेत्रको बारेमा म जानकार छु । स्थानीय सरकारसँग सहकार्य र समन्वय गरेर यहाँको विकासको लागि पहल गर्छु ।’ आफू अहिले केही गर्न सक्ने स्थानमा पुगेको भन्दै मन्त्री केसीले खजुरासहित बाँकेको लागि आफूले गर्न सक्ने भूमिका निभाउन तयार रहेको बताइन् ।

‘अहिले म केही भएपनि गर्नसक्ने ठाउँमा पुगेकी छु । सबैको सहकार्यमा म काम गर्छु’ उनले भनिन्, ‘खजुराको स्थानीय सरकारले गर्न नसक्ने काम प्रदेशबाट गर्न तयार छु । प्रदेशबाट पनि हुन नसक्ने कामको समन्वय संघीय सरकारसँग गरेर गर्ने प्रतिवद्धता जनाउन चाहान्छु ।’ अर्को प्रसंगमा मन्त्री नमुनाले नेपालमा अहिलेको व्यवस्था परिवर्तनमा मगर समुदायको समेत महत्वपूर्ण भूमिका रहेको बताइन् ।

‘नेपालमा विभिन्न कालखण्डमा भएका व्यवस्था परिवर्तनमा मगर समुदायको भूमिका हामीले बिर्सन हुँदैन’ उनले भनिन्, ‘प्रजातन्त्रदेखि गणतन्त्र आउँदासम्म उनीहरुको भूमिका धैरे छ ।’ नेपालमा मात्र नभएर विदेशी भूमीमा समेत मगर समुदायको आफ्नै प्रतिष्ठा रहेको मन्त्री केसीले दाबी गरिन् ।

प्रकाशित मिति: सोमबार, फागुन १५, २०७९ १७:४९

प्रतिक्रिया दिनुहोस्