राष्ट्रपति निर्वाचनको असरले अप्ठ्यारोमा लुम्बिनी प्रदेश सरकार

राजनीति

गृहपृष्ठ
राजनीति
राष्ट्रपति निर्वाचनको असरले अप्ठ्यारोमा लुम्बिनी प्रदेश सरकार

राष्ट्रपति निर्वाचनको असरले अप्ठ्यारोमा लुम्बिनी प्रदेश सरकार

बिहीबार, फागुन १८, २०७९ बागेश्वरी पोस्ट

नेपालगन्ज । लुम्बिनी प्रदेशमा राष्ट्रपति निर्वाचनलाई लिएर केन्द्रमा फेरिएको सत्तासमीकरणको असर परेको छ । सत्ता समीकरणबाट फेरिएको असर सबैभन्दा पहिले लुम्बिनी प्रदेशमा पर्ने भएको हो ।

यो प्रदेशमा यसअघि दुईवटा राजनीतिक दलले सरकारलाई दिएको समर्थन फिर्ता लिने निर्णय गरेकोमा अब यो कडीमा थप ४ वटा दल जोडिएको छ । प्रदेश सरकारबाट एकैपटक ६ वटा राजनीतिक दलले समर्थन फिर्ता लिने भएका छन् ।

राष्ट्रपति निर्वाचनमा एकै ठाउँमा रहेका ६ वटा राजनीतिक दलले प्रदेशलाई दिएको समर्थन फिर्ता लिने निर्णय गरेको छ । नेपाली कांग्रेस र नेकपा (एकीकृत समाजवादी) सहित ८ दलको भालुवाङमा बसेको बैठकले एकैपटक समर्थन फिर्ता लिने निर्णय गरेको कांग्रेस संसदीय दलका नेता डिल्लीबहादुर चौधरीले बताएका छन् ।

सरकारलाई समर्थन दिएका दलले एकैपटक समर्थन फिर्ता लिएर त्यसपछि ८ दलको संयुक्त सरकार बन्ने उनको भनाई छ । लोसपा संसदीय दलका नेता सन्तोषकुमार पाण्डेयले पनि समर्थन दिएका सबै दलले फिर्ता लिने तयारी गरिरहेको बताए ।

उनका अनुसार शुक्रबार एकैपटक समर्थन फिर्ता लिने निर्णय भएको छ । अहिले एमाले संसदीय दलका नेता लीला गिरी मुख्यमन्त्री छन् । उनलाई माओवादी, नागरिक उन्मुक्ति, राप्रपा, जसपा, जनमत, लोसपा, एकीकृत समाजवादी र दुई स्वतन्त्र सांसदको समर्थन छ ।

राष्ट्रपति निर्वाचनका सन्दर्भमा शुक्रबार शीर्ष नेताहरू प्रदेस सांसदहरूको अभिमुखीकरणका लागि दाङ पुग्ने कार्यक्रम छ । यो कार्यक्रमपछि सरकारबाट सामूहिक समर्थन फिर्ता लिने नेताहरूको भनाई छ ।

समर्थन फिर्तापछि आफ्नो नेतृत्वमा सरकार बनाउने ८ दलको तयारी छ । ८७ सदस्यीय प्रदेसभामा सरकार बनाउन कम्तिमा ४४ सांसदको समर्थन जरूरी हुन्छ । एमाले नेता गिरी मुख्यमन्त्री नियुक्त हुँदा ७ दलका ५६ र दुई स्वतन्त्र सांसदहरूले समर्थन गरेका थिए ।

समर्थन गरेका मध्ये ६ वटा दलले एकैपटक फिर्ता लिने तयारी गरेपछि गिरी नेतृत्वको सरकार संकटको संघारमा पुगेको छ । राप्रपाले सरकारलाई दिएको समर्थन कायमै राखे पनि उनको पक्षमा आफ्नो पार्टीसहित ३३ सांसद मात्र हुनेछन् ।

प्रदेससभामा पहिलो दल रहेको एमालेसँग २९ र माओवादी केन्द्रका १० सांसद छन् । यसैगरी सरकारलाई साथ दिएको राप्रपाका ४ र जसपाका ३ सांसद छन् ।

प्रकाशित मिति: बिहीबार, फागुन १८, २०७९ १३:५१

प्रतिक्रिया दिनुहोस्