खोप छुट बच्चाहरुलाई 'खोज र खोप' अभियान चलाउँदै नेपालगञ्ज उपमहानगर

समाचार

गृहपृष्ठ
समाचार
खोप छुट बच्चाहरुलाई 'खोज र खोप' अभियान चलाउँदै नेपालगञ्ज उपमहानगर

खोप छुट बच्चाहरुलाई 'खोज र खोप' अभियान चलाउँदै नेपालगञ्ज उपमहानगर

सोमबार, फागुन २९, २०७९ बागेश्वरी पोस्ट

नेपालगञ्ज । नेपालगञ्जमा पूर्ण खोप सुनिश्चितता र दिगोपनामा निरन्तरताका लागि कार्ययोजना तयार गर्न वडा वडामा कार्यशाला गोष्ठी भइरहेका छन् । युनिसेफको सहयोगमा नेपालगञ्ज उपमहानगरपालिका स्वास्थ्य महाशाखाले सबै वडाका स्वास्थ्य केन्द्रहरुमा पुगेर कार्यशाला गोष्ठी गरिरहेको हो ।

वडा स्तरदेखि नै छुट बच्चाहरुको खोजी र खोप प्रदान गर्ने नियमित प्रक्रियाको विकास गर्ने उद्देश्यले कार्यशाला गोष्ठी गरिरहेको नेपालगञ्ज उपमहानगरपालिकाका जनस्वास्थ्य निरीक्षक जागेश्वर बस्नेतले बताए । नियमित खोप छुट बच्चाहरु, कारणको पहिचान र विश्लेषण गर्ने गरी कार्यशाला गोष्ठीबाटै कार्ययोजना बनाइरहेको बस्नेतले बताए । पूर्ण खोप कार्यक्रमको लागि महिला सामुदायिक स्वास्थ्य स्वयंसेविकाहरुको क्षमता अभिबृद्धि गर्ने उद्देश्य पनि लिइएको छ । वडास्तरमा वडा अध्यक्ष संयोजक रहने गरी बनेको खोप समन्वय समितिलाई अझ सक्रिय बनाएर अनुगमनका लागि उत्प्रेरित गर्ने उद्देश्य पनि छ ।

नेपालगञ्जलाई गत वर्ष नै पूर्ण खोप घोषणा गरिसकिएको छ। पूर्ण खोप घोषणा भएको नेपालगञ्जमा हालसालै दादुरा महामारी देखिएको थियो । दादुरा संक्रमित बालबालिकाले खोप नलगाएको पाइएको थियो । जनस्वास्थ्य निरीक्षक बस्नेतले बैशाखमा गर्ने पूर्ण खोप सुनिश्चितता तथा दीगोपन घोषणाका लागि कोही पनि बालबालिका खोपबाट बन्चित नहुन् भन्नका लागि घरदैलो अभियान र सर्वेक्षण थालेको बताए ।

यसैक्रममा आज नेपालगञ्जको वडा नम्बर ३ र १५ मा कार्याशाला गोष्ठी गरिएको जनस्वास्थ्य निरीक्षक तेज वलीले बताए । कार्यशालामा वडा अध्यक्ष, वडा सदस्यहरु, स्वास्थ्य चौकी प्रमुख, स्वास्थ्य चौकीका स्वास्थ्यकर्मी, स्वास्थ्य स्वयंसेविका, स्थानीय विद्यालय व्यवस्थापन समितिका प्रतिनिधि, शिक्षक प्रतिनिधि, पत्रकार लगायत उपस्थित थिए । यसअघि वडा नम्बर ५, ६, ७, ८, १३, १४, १६, १७, १९, २१, २२ र २३ मा कार्यशाला गोष्ठी गरिसकिएको छ ।

No description available.