लुम्बिनीमा सरकार परिवर्तन गर्ने गृहकार्य शुरु हुँदै

राजनीति

गृहपृष्ठ
राजनीति
लुम्बिनीमा सरकार परिवर्तन गर्ने गृहकार्य शुरु हुँदै

लुम्बिनीमा सरकार परिवर्तन गर्ने गृहकार्य शुरु हुँदै

बिहीबार, चैत २, २०७९ बागेश्वरी पोस्ट

नेपालगन्ज । लुम्बिनी प्रदेश सरकार संकटतामा परेको छ । उपराष्ट्रपतिको छनौट प्रक्रियाको निर्वाचन नजिकिँदै गर्दा लुम्बिनीमा सरकार परिवर्तनको गृहकार्य शुरु हुन थालेको बताइएको छ । एमालेबाट मुख्यमन्त्री बनेका लिला गिरीको नेतृत्वको लुम्बिनी प्रदेश सरकार सङ्कटमा पर्ने देखिएको छ ।

उपराष्ट्रपतिको निर्वाचनपछि लुम्बिनीमा भएको गिरी नेतृत्वको सरकार ढालेर नयाँ सरकार बनाउने गृहकार्य चलिरहेको बताइएको छ । केन्द्रीय राजनीतिक समीकरण अनुसार प्रदेशका दलहरूले सरकार फेरबदल बारेमा छलफल गर्दै आएको स्रोतले जनाएको छ ।

उपराष्ट्रपतिको निर्वाचन सकिएपछि माओवादी सहितका दलहरूले वर्तमान सरकारलाई दिएको समर्थन फिर्ता लिने तयारी गरेको माओवादी केन्द्रका लुम्बिनी प्रदेश अध्यक्ष सुदर्शन बरालले बताएका छन् । उनले भने, सरकार परिवर्तनबारे प्रयास हुनेछ । सम्भवतः चैतको पहिलो साताभित्र समर्थन फिर्ता लिने तयारी रहेको उनले बताए ।

लुम्बिनी सरकारको गठबन्धनमा नेपाली कांग्रेस, माओवादी केन्द्र, राष्ट्रिय जनमोर्चा, नागरिक उन्मुक्ति, लोपसा र जसपा लगायत ८ दल रहेका छन् । तर राप्रपाले भने अहिलेसम्म एमालेलाई साथ दिने जनाएको छ । समर्थन फिर्ता लिएपछि नैतिकताको आधारमा मुख्यमन्त्री लिला गिरीले राजीनामा दिने विश्वास दलहरूको छ ।

नेपाली कांग्रेस लुम्बिनी प्रदेश संसदीय दलका नेता डिल्ली चौधरीले पनि चैत ७ गतेभित्रै प्रदेश सरकारप्रतिको समर्थन फिर्ता लिने तयारी रहेको बुझिएको छ । यस बिषयमा नेता चौधरीलाई सम्पर्क गर्दा मोबाइल स्विच अफ भएकाले निकट स्रोतले उद्धृत गरेको छ । माओवादीसहित साना दलले समर्थन फिर्ता लिएमा नयाँ सरकार गठनको प्रक्रिया अघि बढ्ने भएको छ ।

यता राप्रपाका लुम्बिनी प्रदेश अध्यक्ष प्रदीप उदयले भने राप्रपाले एमालेको साथ नछोड्ने बताए । उनका अनुसार आफूहरू यही सरकारलाई साथ दिने बताउँदै वर्तमान सरकारलाई नै निरन्तरता दिने पक्षमा रहेको स्पष्ट पारे । लुम्बिनीमा एमालेको २९ र राप्रपाको ४ सिट छ । प्रदेशसभामा बहुमतका लागि कम्तीमा ४४ सिट आवश्यक हुन्छ ।

लुम्बिनीमा जम्मा ८७ जना सांसदहरू छन् । जसमा नेपाली कांग्रेस २७, नेकपा माओवादी केन्द्र १०, राष्ट्रिय प्रजातन्त्र पार्टी ४, नेकपा एमाले २९, जसपा ३, नागरिक उन्मुक्ति ४, लोसपा ३, जनमत पार्टी ३, स्वतन्त्र २, राष्ट्रिय जनमोर्चा पार्टी १ र एकीकृत समाजवादी पार्टी १ रहेका छन् । लुम्बिनीमा अब मुख्यमन्त्री परिवर्तन भएपछि नेपाली कांग्रेस अथवा माओवादी केन्द्रबाट मुख्यमन्त्री बन्ने पक्कापक्की छ ।

प्रकाशित मिति: बिहीबार, चैत २, २०७९ १३:५७

प्रतिक्रिया दिनुहोस्